Xefe Estadu Preokupa Preparasaun Infraestrutura Ba Siméria ASEAN 2029 La’o Atrazu

Dezeñu areadór International Convention Centre (ICC) iha Portu Díli.

Díli, 17 Juñu 2026 (RAFA.TL)- Prezidente Repúblika (PR), José Ramos-Horta, preokupa  ho preparasaun Governu nian, liu-liu ba iha area infraestrutura hanesan aeroportu no otél sira ne’ebé lao atrazu tebes liga ho preparasaun Timor-Leste assume prezidénsia Siméria ASEAN 2029.

“Ha’u hatete ema balu preokupadu loos ba atrazu iha Timor-Leste kona-bá infraestrutura ba siméira ASEAN nian 2029. Sira husu lisensa ba otél sira, husu ne’e halo ona  ka lae, tanba Governu mak husu ba sira, atu halo otél estrela sira ho lalais, ida de’it la sufisiente, maibé to’o agora, lisensa oan ida de’it mós, susar tebe-tebes, buat ne’ebé iha rai seluk Governu halo dezisaun ohin ratifika kedan,” Ramos-Horta hateten.

Tuir Xefe Estadu nia haré  katak, infraestrutura boot sira hanesan aeroportu tenke prontu minimu fulan-neen antes,  para bele halo teste oin-oin aviaun nia semo  tuun no  sa’e, teste Imigrasaun, teste Alfándega no mós  texte kuarentina saúde nian.

“Ita mak hakarak ita mak presiza, ida-ne’e dada to’o agora  aeroportu ne’e  la book aan, loloos avansa tiha ona, iha prosesu hela problema iha prosesu hela, maibé ita la haré servisu, difisíl tebes atu halo aeroportu ne’e prontu ba 2029,” Xefe Estadu hateten tan.

Prezidente Repúblika argumenta katak tuir loloos otél sira ne’ebé atu simu bainaka importante sira ne’ebé sei mai partisipa iha Siméria ASEAN 2029, tenke prontu ona,  no iha  garantidu hodi bele halo  rekrutatamentu ba  traballadór sira, husi traballador bazikú to’o espesializadu nian.

Jornalista: Zita Menezes/Editór: Vito Salvadór