Juventude Mundiál Deskobre “Valór Dame Nian” iha Seoul: Husi Memoriál Funu To’o Palásiu Gyeongbokgung

Imajen/repro.HWPL

Seoul, 03 Outubru 2026 (RAFA) – Juventude husi nasaun 43 iha mundu, halibur malu iha sidade Seoul, Korea du Sul, hodi hola parte iha programa kbiit-boot ida ne’ebé uza eransa kulturál no istórika hodi introdus signifika sira dame no koezisténsia nian.

Eventu ne’e hanesan plataforma ida ne’ebé transforma espasu koñesidu sira iha Korea sai fali “fatin aprendizajen”  ka “sala ba aula” ba joven sira husi fatin hotu-hotu iha mundu.

Komunikadu ofisiál ne’ebé RAFA asesu, Sábadu-ne’e, revela katak programa ne’e organiza husi organizasaun Heavenly Culture, World Peace, Restoration of Light (HWPL) nu’udar entidade ida ne’ebé iha estatutu Konsultivu Espesiál ho Konsellu Ekonómiku no Sosiál ONU nian (ECOSOC), ho títulu “HWPL International Youth Peace Program” ne’ebé hala’o durante loron-tolu, husi loron 17 to’o loron 19 fulan-Setembru tinan 2026.

Ho tema prinsipál “Ita, Eransa Dame nian ne’ebé Moris” (“We, the Living Legacy of Peace”), programa ne’e fahe ba etapa tolu: Deskobre, Aprende, no Atua (Discover, Learn, and Act).

Objetivu prinsipál mak atu partisipante sira bele aplika valór dame nian ne’ebé sira aprende iha Korea ba fali sira-nia komunidade rasik kuandu fila.

Deskobre Memória Funu nian no Respeitu Kulturál

Iha loron primeiru, 17 fulan-Setembru, joven sira vizita Memoriál Funu Korea nian hodi hateke besik ba susar no kanek ne’ebé funu husik hela ba ema ida-idak, família, no ba jerasaun foun. Iha eventu ne’e Prezidente Konsellu Nasionál Juventude Fiji nian (NYCF), ne’ebá, Laisani Sepo, haktuir katak presiza duni “vontade ne’ebé forte tebes” hodi kontinua harii dame maske enfrenta dezafiu barak.

Hafoin ne’e, iha Insadong, joven sira aprende oinsá “komprende” kultura foun ida bele lori ba “respeitu” no ikus mai nakfilak ba “troka hanoin” di’ak entre povu sira.

Alwand Talaat Jawhar Caluri husi organizasaun Public Aid Irake nian, subliña katak importante tebes atu fó espasu ne’ebé seguru ba joven sira ho baze relijioza oioin hodi fahe sira-nia preokupasaun kona-ba dame.

Iha fatin istóriku hanesan Gwanghwamun no Palásiu Gyeongbokgung, partisipante sira analiza dame liu husi lia fuan-xave lima: Eransa, Respeitu, Responsabilidade, Mudansa, no Armonia. Sira foti ezemplu husi Liurai Sejong the Great no kriasaun alfabetu Korea nian (Hangeul) hodi aprende oinsá desizaun ne’ebé líder ida foti bele lori mudansa boot ba sosiedade.

CEO Mental Health and Anti-Drug Abuse nian, Andrew Junior Mwima,  fó hanoin katak

joven sira mak ema ne’ebé haruka ba funu. Ne’e katak joven sira mós bele sai fali ema ne’ebé lidera inisiativa dame nian iha okaziaun oioin. Juventude sira la’os líder ba futuru. Ita mak líder ba ohin loron.”

Aprende no Prepara Azaun ba 2027

Iha loron 18 Setembru, programa ne’e tama ba etapa “Aprende” liu husi diskusaun meza-rodonda kona-ba “Papél Juventude nian iha Habelar Kultura Dame nian”.

Diskusaun ne’e bazeia ba Artigu 8, 9, no 10 husi Deklarasaun Dame no Hesuk Funu nian (DPCW), ne’ebé ko’alia kona-bá prevensaun funu, rezolusaun konflitu, no promosaun dame entre relijiaun no grupu étniku sira.

Joven sira mós foti parte iha Akademia Internasionál ba Dame Relijioza hodi estuda testu sagradu husi relijiaun Budizmu, Konfusianizmu, Kristanizmu, Musulmanu, no Induizmu.

Iha loron ikus, 19 fulan-Setembru, ne’ebé hanesan etapa “Atua”, partisipante sira fahe estudu kazu husi Youth Engagement & Peacebuilding Working Group (YEPW).

Sira uza oportunidade ne’e hodi dezenvolve planu azaun ba tinan 2027 no define papél membru ida-idak nian ba projetu reziunál sira.

Sekretáriu-Jerál HWPL, Kang Tae-ho, subliña katak dame la’ós eransa ida ne’ebé ita simu de’it, maibé eransa ida ne’ebé ita tenke husik hela ba jerasaun futuru sira ba nafatin. Ha’u hein katak partisipante sira sei foti resposta ne’ebé sira hetan iha Korea no transforma ida ne’ek sai azaun loloos iha sira-nia rai.

Mensajen esperansa mós mai husi Sarah Vermaut, estudante direitu ida husi rai Béljika (Free University of Brussels). Nia dehan “Ha’u estudante de’it. Tanba sá ema tenke rona ha’u? Maibé se ita hanoin hanesan ne’e, ita sei la muda buat ida.”

Nia hateten katak nia hakarak duni fahe buat ne’ebé nia aprende ona ho nia kolega sira hodi organiza fali atividade dame nian iha nia rai.

Jornalista: Zita Menezes