MACLN Lansa Primeira Pedra Monumentu Saudozu Sebastião Gomes

Modelu Monumentu memoriál Saudozu Sebastião Gomes ne'ebé sei konstrui iha semitériu Santa Kruz, Díli.

Díli, 02 Outubru 2026 (RAFA) -Ministériu Asuntu Kombatente  no Libertasaun Nasionál (MACLN, sigla portugés) hamutuk ho Prezidente Autoridade Munisípiu Díli, Francisco dos Santos no Prezidente Komité 12 de Novembru, Gregorio Saldanha “Mauris” no família sira, Sesta-ne’e,  lansa primeira pedra ba konstrusaun monumentu no preservasaun memória Saudozu Sebastião Rangel Gomes, iha semitériu Santa Kruz, Díli.

Sauduzu Sebastião Rangel Gomes hetan tiru husi forsa armada Indonézia (ABRI, sigla indonézia) no intelejen Indonézia nian iha kalan 28 fulan-Outubru tinan 1991 iha Igreja Motael iha Díli.

Altura ne’ebá, Saudozu Sebastião Rangel Gomes ho nia maluk joven klandestina sira subar  iha Igreja Motael hodi prepara manifestasaun ba vizita delegasaun Parlamentar hosi Portugál.

Saudozu Sebastião Gomes, nu’udar ativista rezisténsia iha frente klandestina nia mate mak  hamosu kauza prinsipál ba akontesimentu Masakre Santa Kruz iha loron 12  fulan-Novembru  tinan 1991.

Ministru Gil da Costa Monteiro  ‘’Oan Soru’’ hateten objetivu husi mudansa restus mortais ne’e atu fasilita família no ema hotu ne’ebé hakarak presta omenajen ba Saudozu Sebastião Gomes.

“Ita muda Saudozu Sebastião Gomes nia restus mortais mai iha oin, ida ne’e pozitivu tebes, para ema hotu atu hatene katak valorizasaun ne’e pertense ida mós ba nia,” Ministru Gil Oan  Soru. hateten

Ministru ne’e mós subliña katak Saudozu Sebastião Gomes merese atu hetan valorizasaun husi Estadu, konsidera nia kontribuisaun iha luta ba libertasaun Timor-Leste.

Nia mós apela ba sidadaun sira, liuliu jerasaun foun, atu kontinua aprende no preserva istória husi inan-aman sira, barak mak brani halo istória. Tanba ne’e, nu’udar jerasaun kontinua, labele kiak ho istória. Inan-aman sira hato’o istória ne’ebé loos, no oan sira tenke aprende istória atu konserva ba futuru, para jerasaun sira labele kiak ho istória husi sira nia inan-aman.

Iha fatin hanesan, Diretór Kompañia SG Lda, Tiago Guterres, ne’ebé responsabiliza ba konstrusaun monumentu Saudozu Sebastião Gomes, hateten katak kompañia sei asegura konstrusaun no la estraga jardin sira ne’ebé Governu harii ona iha área  simiteriu Santa Kruz nia oin.

Nia hateten ideia konstrusaun monumentu ne’e mós bazeia ba konsiderasaun teknika, ho objetivu atu fó valorizasaun ba Saudozu Sebastião Gomes no fasilita ema sira atu identifika nia rate.

Tuir ekipa tékniku konstrusaun, projetu ne’e sei hala’o durante fulan-tolu, hahú husi fulan-Outubru-ne’e to’o fulan-Dezembru 2026.

“Material konstrusaun ne’e rasik tuir desizaun família. Ida ne’e artistiku ho bronze tolu, plaka rua no fatuk ida, tuir konseitu fatuk Uaimori, no sei uza marmeru,” Tiago Guterres informa.

Nia hatutan katak projetu ne’e sai husi ideia konjunta entre kompañia no família, ne’ebé diskute ona molok realiza lansamentu primeira pedra.

Moises de Carvalho Nazaré, reprezentante família Saudozu Sebastião Gomes, hato’o agradese ba Governu tanba valoriza kontribuisaun Saudozu Sebastião Gomes iha tempu luta ba libertasaun.

Nia hateten katak família no Komité 12  Novembru halo ona komunikasaun no konkordánsia antes konstrusaun monumentu ne’e, inklui husu autorizasaun ba inan no aman husi Saudozu Sebastião Gomes.

“Nu’udar reprezentante família, ha’u hamutuk ho Komité 12 de Novembru halo komunikasaun ho nia pai ho mãe, hodi husu autorizasaun. Buat ne’ebé governu no Estadu halo, ita tenke valoriza,” Moises de Carvalho Nazaré hateten.

Konstrusaun monumentu Saudozu Sebastião Gomes finansia husi Fundu MACLN, tuir akordu ho Komité 12 de Novembru implementasaun projetu, inklui prosesu mudansa restus mortais Saudozu Sebastião Gomes ba lokal foun ho total orsamentu US$93,524.23.

Kompañia ne’ebé responsabiliza ba konstrusaun mak SG (Soares & Guterres), Lda., iha parseria ho Atelier do Eskultor.

Jornalista : Remigia Locatelli