Vise-PM Mariano Assanami husu Ema Hotu Respeita Lutu Nasionál Ba Falesimentu Lider Nasionál Francisco Guterres “Lú-OLo”

Governu dekreta lutu nasionál durante loron hitu, hahú hosi tuku 3 lokraik iha loron 22 fulan-Juñu to'o tuku 12 kalan iha 28 fulan-Juñu 2026, ho bandeira nasionál hasa’e to’o ai-riin klaran (meia haste).

Díli, 22 Juñu 2026 (RAFA.TL)- Vise-Primeiru-Ministru, Ministru Koordenador ba Asuntu Sosias no Dezenvolvimentu Rural no Abitasaun Komunitária, Mariano Assanami Sabino husu ema hotu iha Timor larn tomak, liuliu joven sira nia konsiénsia fó respeita no onra ba Lutu Nasionál  falesimentu lidér nasionál Francisco Guterres “Lú-Olo ne’ebé Governu dekreta tiha ona liuhosi Konsellu-Ministru extraórdinariu, Segunda, 22 Juñu 2026.

Vise-Primeiru-Ministru, Ministru Koordenador ba Asuntu Sosias no Dezenvolvimentu Rural no Abitasaun Komunitária Mariano Assanami Sabino, hato’o lia hirak ne’e tanba daudaun ne’e Timor-Leste no mundu  iha hela ámbitu festa Kopa Mundiál 2026, nune’e husu povu Timor-Leste liuliu joven sira nia konsiénsia atu respeita lutu nasionál ba falesimentu lidér nasionál Francisco Guterres “Lú-OLo”

“Ita husu konsiénsia ba joven sira, konsiénsia ba povu katak ita hotu triste tanba ita nia lidér nasionál kada loron  ita sempre haré katak la’ós de’it katuas sira, maibé joven sira iha rejisténsia loriku asuwain ne’e barak mak ba daudaun. Tanba ne’e ita husu konsiénsia para oinsá ita bele respeita no fó onra no gloria ba ita nian sobrevivente sira,” Mariano Assanami Sabino haktuir  ba jornalista sira hafoin remata reuniaun Konsellu Ministru iha Edifisiu Ministériu Finansa.

Governu dekreta lutu nasionál durante loron hitu, hahú hosi tuku 3 lokraik iha loron 22 fulan-Juñu to’o tuku 12 kalan iha loron 28 fulan-Juñu, tinan ne’e, ho bandeira nasionál hasa’e to’o ai-riin klaran de’it (meia haste) iha edifísiu públiku hotu-hotu, inklui embaixadas, konsuladus no reprezentasaun sira seluk Estadu nian iha rai-li’ur, no mós iha ró sira Estadu nian.

Ho alterasaun ida-ne’e, Governu fó omenajen ba membru ida ne’ebé importante iha luta libertasaun nasionál no hato’o sentidu kondolénsia kle’an ba nia espoza, oan sira no membru família sira seluk, ba FRETILIN, no mós  ba povu timoroan tomak, hodi rekoñese legadu dedikasaun no servisu ne’ebé Francisco Guterres “Lú Olo” fó ba konstrusaun Timor-Leste ida ne’ebé livre, demokrátiku no soberanu.

Saudozu Francisco Guterres “Lú Olo” mate ho tinan 71, iha Ospitál Prince Court iha Kuala Lumpur, Malázia, iha ne’ebé nia simu hela tratamentu médiku intensivu.

Nia moris iha Ossú, iha Munisípiu Viqueque, iha loron 7 fulan-Setembru tinan 1954, nia dedika parte boot hosi nia moris ba luta libertasaun nasionál, kaer responsabilidade oioin iha rezisténsia durante okupasaun indonézial

Sorumutu Estraordináriu Konsellu Ministru,  loron 22 fulan-Juñu ne’e, iha Auditóriu Kay Rala Xanana Gusmão,  Ministériu Finansas, Díli,  aprova votu pezar no deside hodi dekreta lutu nasionál ba falesimentu saudozu Francisco Guterres “Lú-Olo” durante loron hitu nian laran.

Vise-Primeiru-Ministru, Ministru Koordenador ba Asuntu Sosias no Dezenvolvimentu Rural no Abitasaun Komunitária Mariano Assanam Sabino haktuir  sorumutu Konsellu-Ministru extraórdinariu Governu dekreta para fó tratamentu protokolu estadu nian, ho nune’e, oriente ona ba Ministériu Asuntu Kombatente Libertasaun Nasionál (MACLN siglá portugés) atu bele organiza  prosesu hotu relasiona ho falesimentu saudozu Francisco Guterres “Lú Olo”

Vise-Primeiru Ministru Mariano Assanami Sabino  afirma  maské Governu dekreta  ona lutu nasionál, maibé  atividade servisu no eskola sira nafatin halo atividade aprendizasen  hanesan loron bai-bain.

Tuir infomasaun saudozu Francisco Guterres “Lú-Olo” nia mate-isin husi Malázia sei mai ho Aviaun Aero Díli ne’ebé aluga husi estadu no sei to’o iha Aeroportu InternasionálPrezidente  Nicolau Lobato, Tersa-dadeer, tuku 6:00 Otl no simu direita husi parada militár hodi lori liubá  nia  rezidénsia iha Farol Díli.

Jornalista : Zita Menezes/Editór: Vito Salvadór