PM Xanana Relata Estratejia Governu Rezolve Impaktu husi Krize Internasionál iha Reuniaun Konsellu Estadu

Prezidente Repúblika, José Ramos-Horta prezide reuniaun estraordináriu Konsellu Estadu iha Palásiu Prezidensiál, Sesta 15 Maiu 2026. Imajen/Média GPR

Díli, 15 Maiu 2026 (RAFA.TL)—Prezidente Repúblika, José Ramos-Horta, Sesta (15/05/2026), iha Palásiu Prezidensiál, konvoka reuniaun estraordináriu Konsellu Estadu.

Reuniaun estraordináriu órgaun konsultivu Konstitusionál ba Prezidente Repúblika ne’e, partisipa mós husi Prezidente Parlamentu Nasionál, Maria Fernanda Lay, Primeiru-Ministru Kay Rala Xanana Gusmão, eis Prezidente Repúblika, Francisco Guterres ‘Lú Olo”, eis Prezidente Repúblika no eis Primeiru-MInistru, Taur Matan Ruak,  Tenente Jenerál Reformadu Lere Anan Timur, lider istóriku  Abilio de Araújo, no membru Konsellu Estadu sira seluk tan.

Komunikadu ofisial ne’ebé Rafa.tl asesa haktuir iha reuniaun ne’e, Prezidente Repúblika, José Ramos-Horta  fó biban ba PM Xanana Gusmão hodi relata iha Konsellu Estadu kona-bá asuntu balun ne’ebé iha importánsia boot, mak hanesan  Polítika no estratéjia Governu nian atu rezolve impaktu hosi krize internasionál oioin ba Timor-Leste nia ekonomia no ninia ramifikasaun sosiál sira, progresu iha negosiasaun ho kompañia mina-rai parseiru sira iha dezenvolvimentu kampu gás gereater sunrise, negosiasaun ho Indonézia kona-bá fronteira terrestre no tasi entre Timor-Leste ho Indonézia no preparasaun tékniku ba eleisaun prezidensiál iha 2027.

Iha komunikadu ne’e, Ramos-Horta haktuir PM Xanana, indivíduu ida ne’ebé estuda tebes no kolen, halo aprezentasaun ida ne’ebé metikulozu no esklaresedór tebes kona-bá asuntu sira ne’ebé iha importánsia boot ba Timor-Leste.

Governadór Banku Sentrál Timor-Leste, Helder Lopes, hetan konvite hodi komplementa Primeiru-Ministru nia komentáriu kona-bá jestaun Fundu Rikusoin Soberanu Timor-Leste nian.

Indikadór ekonómiku sira pozitivu, ho projesaun kreximentu 5% iha 2026. Inflasaun ki’ik.

Tuir Fundu Monetáriu Internasionál (FMI), Timor-Leste nu’udar nasaun ida hosi nasaun uitoan iha mundu ne’ebé ladún afetadu hosi krize enerjétika no ekonómika mundiál.

“Ho fundu rikeza soberanu ne’ebé jere ho di’ak no rezerva fundu ne’ebé forte, ne’ebé ita uza atu mitiga impaktu sosiál husi krize enerjia no sasán konsumu nian. Timor-Leste hetan benefísiu hosi apresiasaun dolar amerikanu nian hasoru moeda sira hosi nasaun sira ne’ebé ita iha défise komersiál boot. Ita-nia konta importasaun nian monu ho apresiasaun dolar nian,” hateten Ramos-Horta iha komunikadu ofisiál ne’e.

Jornalista: Elio dos Santos/Editór: Vito Salvadór