Governu Halo Ona Pagamentu US$9,599,306 Ba Família Afetadu Eviksaun Hamutuk 1.370

Ministru Obras Públiku (MOP), Samuel Marçal akompaña husi Ministra Finansas, Santina José Rodrigues F. Viegas Cardoso, iha diskusaun Orsamentu Retifikativu iha faze espesiálidade iha Parlamentu Nasionál, Segunda (01/06/2026).

Díli, 01 Juñu 2026 (RAFA.TL)- Ministru Obras Públiku (MOP), Samuel Marçal, informa, Governu halo ona pagamentu ho orsamentu US$9,599,306,  ba  família uma-kain afetadu evikasaun sira hamutuk 1.370 iha teritoriu nasionál.

Ministru Obras Públiku (MOP), Samuel Marçal hato’o  deklarasaun  ne’e hodi hatán ba preokupasaun Deputadu sira husi  Bankada opozisaun  iha Parlamentu Nasionál ne’ebé sempre preokupa ba asuntu eviksaun no indeminizasaun ba afetadu sira iha debate Orsamentu Retifikativu 2026 faze espesialidade iha  Segunda,  (01/06/2026).

“Temi kona-bá eviksaun, ita halo eviksaun lubuk ida, eviksaun iha Díli laran iha Munisipíu Baucau, ita selu ona família uma-kain hamutuk 1.370. Ho osan hamutuk $9,599,306 ,” Ministru Samuel Marçal hateten.

Membru Governu ne’e  hatutan,  família uma-kain afetadu eviksaun balu to’o agora Governu seidauk halo pagamentu tanba afetadu balu seidauk iha konkordansia ho montante orsamentu pagamentu nian.

Ministériu Obras Públiku  sei buka solusaun hodi bele halo pagamentu ka selu tuir dadus ne’ebé mak  teknikú sira levanta ona iha terenu ba família afetadu sira.

Xefe Bankada PLP iha Parlamentu Nasionál, Maria Angelina Sarmento hateten, projetu ne’ebé agora realiza iha Díli laran, ezemplu Governu iha semana ida nian laran de’it  halo eviksaun no sobu iha fatin haat  ka lima dala ida, maibé oinsá ho nian prosesu indemnizasaun.

“Sé fatin sira ne’ebé mak agora sobu hotu ona ne’e indemnizasaun ba populasaun sira oinsá, sé ita dada beibeik sira laiha serteza ba sira nia fatin seguru atu sira bele hela, iha fatin balu  kuazé uma ne’e destroi kompletamente 100% entaun sira la hatene sira atu ba ne’ebé,” Deputada Maria Angelina Sarmento kestiona.

Iha fatin hanesan membru PN husi Bankada KHUNTO Luis Roberto  mós sekunda katak  kona-bá populasaun ne’ebé mak hetan eviksaun mós seidauk hetan sira nia direitu  indemnizasaun ba sira nia hela fatin.

Jornalista: Zita Menezes/Editór: Vito Salvadór