ETO-TELCO Fó Sub-Lisensa Ba RTTL, E.P Transmite Kopa Mundiál 2026

Prezidente Koonsellu Administrasaun RTTL,E.P. Rozario Martins asina akordu kontratu ho Jerente ETO TELCO, Edmundo Freitas Lopes iha lisesan sub-transmisaun Kopa Mundiál 2026.

Díli, 22 Maiu 2026 (RAFA.tl)- Empreza ETO-TELCO fó sub-lisensa ba Rádiu Televizaun Timor-Leste, Empreza Públika (RTTL, E.P), hodi transmite Kopa Mundiál 2026 ba teritóriu nasionál liu husi transmisaun free to air ho valor kontratu $200,000.00

Empreza Grupu Esperança Timor Oan (ETO) liu husi nia subsidiária empreza ETO-TELCO sai hanesan empreza ne’ebé hetan lisensa ofisiál FIFA World Cup Broadcasting Rights iha Timor-Leste ho valor kontratu $400,000.00

Jerente ETO-TELCO, Edmundo Freitas Lopes, ba jornalista sira iha Edifísiu RTTL, E.P, Caicoli, Sesta (22/05/2026), hateten empreza ETO-TELCO asina ona  akordu ida ho RTTL,E.P hodi fó sub-lisansa  transmisaun direta Kopa Mundiál ba uma kain hotu iha teritóriu nasionál liuhusi teresterial.

Jerente ETO-TELCO ne’e afirma iha akordu ho RTTL,E.P ne’ebé asiste direta husi Sekretáriu Estadu Komunikasaun Sosiál (SEKOMS), Expedito Dias Ximenes ne’e  pontu tolu importante mak hanesan ETO-TELCO fó sub transmisaun liuhusi Free to Air no RTTL tenke garante transmisaun durante jogu inklui halo jestaun diak.

“Empreza ETO-TELCO no RRTL, E.P realiza asina akordu atu transmite Kopa Mundiál 2026 ba territóriu Timor laran tomak, iha pontu tolu ne’ebé ami konkorda hamutuk katak, primeiru ETO-TELCO fó sub-lisensa  free to air ba iha RTTL atu RTTL bele transmite ba teritóriu Timor laran tomak tuir área kobertura ne’ebé RTTL iha. Segundu, empreza ETO-TELCO  garantia jogu 104 ne’e durante fulan ida atu fó sai  ho di’ak no mós garante teknikamente atu oinsa dow fit signal ne’e to’o iha RTTL nia estúdiu, no ikus liu empreza ETO-TELCO, fó hanesan oportunidade ba RTTL atu jere rasik sira nia kontiudu atu bele simu patrosinu oinsá atu zere hodi fó sai ba teritóriu Timor laran tomak,” Edmundo Freitas Lopes esplika.

Prezidente RTTL, E.P, Rosário da Graça Maia, ne’ebé reprezenta RTTL hodi asina kordu ho ETO TELCO hato’o agradese ba Governu bele disponibiliza oportunidade ne’e liuhusi ETO-TELCO hodi fasilita transmisaun ba  eventu boot futeból ne’e no nia parte mós garante sei fasilita transmisaun referida iha teritóriu Timor laran tomak.

Nia hatutan ho kontratu ida ne’e hanesan momentu istóriku ba RTTL, E.P no orgullu bele servisu hamutuk ho ETO-TELCO hodi hetan mós direitu transmisaun ba Kopa Mundiál 2026.

“Hanesan ita hotu hatene katak Kopa Mundiál festa boot ida iha mundu tomak ne’ebé lori inspirasaun no entuziasmu no lori mós motivasaun ba Timor oan, liuliu ba futeból sira ne’ebé oras ne’e karik labarik kiik sira ne’ebe hakarak hahú sira nia kareira iha mundu futeból sira bele haré tuir futebolista mundiál sira ne’ebé sei hola parte iha jogu Kopa Mundiál,” Rosário da Graça Maia hateten.

Prezidente RTTL, E.P ne’e mós agradese ba IX Governu Konstitusionál liu husi SECOMS ne’ebé disponibiliza orsamentu atu RTTL iha beran halo transmisaun direta ba kuaze jogu 104 durante fulan ida nia laran ba eventu boot ida ne’e.

“Agradese SECOMS, agrdese  mós ba ETO-TELCO no espera katak ami sei halo transmisaun direta ho susesu ba timor oan sira hotu,” Nia subliña.

Iha fatin hanesan, Sekretariu Estadu Komonikasaun Sosiál,  Expedito Dias Ximenes agradese ba esforsu ne’ebé ETO-TELCO halo hodi hetan diretu ba transmisaun Kopa Mundiál 2026 mai Timor-Leste no nia parte mós husu iha futuru ETO-TELCO no RTTL,  E.P bele seivisu hamutuk di’ak liután.

SEKOMS hatutan, objetivu governu nia kuandu ko’alia ho jerente ETO-TELCO husu deit ida katak empreza manan diretu transmisaun ne’e mésmu reprezenta deit empreza, maibé nia fó benefisiu boot ba populasaun Timor laran tomak, tanba ne’e mak governu sempre agradese ba ETO-TELCO.

“Ita nia asinatura ohin ne’e barak liu kona-ba  oinsa transmisaun terrestrial, Governu hare katak desportu ne’e nasionál, satan Copa Mundiál, ne’e Futeból ne’e bolu dehan jogu ida hanesan kultura, jogu ida ne’ebé povu hadomi tebes, gosta tebes, ne’ebe Governu dala ida tan husi RTTL liuhusi sekretariu estadu komunikasaun sosiál, ami hakarak agradese ba irmaun Nilton Gusmão CEO ETO nian, atu bele nafatin servisu hamutuk labele iha deit área Futeból nian, maibé ETO mos agora iha mos prepara daudaun ba NTV, nomos agora iha podcast ne’ebe lao hela Radio Falentil, ne’ebe ita nia servisu hamutuk ne’e sei kontinua,” Expedito Dias Ximenes hateten.

SEKOMS hatutan servisu hamutuk ETO-TELCO ho RTTL, E.P sei kontinua ba oin hodi fó satisfasaun ba públiku hafomi futeból iha Timor-Leste hodi akompaña sira nia ekipa favorito iha Kopa Mundiál 2026.

Kopa Mundiál 2026, ETO-TELCO sei fó transmisaun direta liu husi plataforma tolu mak hanesan liu husi ETO-TELCO nia receiver rasik, sub-lisensa ho RTTL, E.P no ikus liu husi streaming Timor Telecom.

Jornalista: Marito da Costa/Editór: Vito Salvadór