Durante Finadu UEP La Rejista Insidente Grave Ruma iha Teritoriu Nasionál

UEP hala'o parada hodi ensera alerta ida durante periodu Finadu husi loron 29 Outubru-04 Novembru 2026.

Díli, 05 Novembru 2026 (RAFA)- Unidade Espesiál Polísia (UEP) , Kuarta-lorokraik, hala’o enseramentu ba alerta Finadu. durante períodu alerta ida, UEP  la rejista insidente grave ruma iha teritoriu nasionál dezde loron 29 fulan-Outubru to’o loron 04 fulan-Novembru 2026.

Komandante UEP, Komisáriu Asistente Polísia Agostinho Gomes,  hateten UEP hala’o parada  hodi ensera alerta ida ne’ebé mak hala’o iha Unidade Espesiál Polísia bazeia ba orden Komandu Jerál PNTL ne’ebé mak simu no inisiu alerta ida dezde loron 29 fulan-Outubru to’o loron 04 fulan-Novembru 2026.

Nia dehan durante hala’o alerta ida iha Kuartel Unidade, iha Kuartel kompañia Alfa iha Caicoli, kompania B iha Baucau, kompania D iha Maliana no postu UEP rua iha Suai no Oeécusse hodi fó apoiu ba komandu munisípiu polísia lima, servisu hotu-hotu hala’o atraves Polísial la’o ho di’ak no laiha problema ne’ebé mak grave.

Durante ámbitu alerta ida, UEP apoiu patrullamentu ba munisípiu lima, hanesan Díli, Baucau, Maliana, Suai no Oé-Cusse ne’ebé rejista laiha problema boot mak akontese durante period alerta ida.

“Mosu duni kazu iha Memo, Postu-Administrativu Maliana, maibé bazeia ba relatóriu Komadante Kompañia Delta ne’ebé aprezenta área ne’e koloka ba unidade PNTL seluk. Maibé, kuandu problema mosu sira atua la konsege husu apoiu Unidade Espesiál Polísia Kompañia D tun halo duni intervensaun finaliza no fó rezolusaun ba problema ne’e ne’ebé laiha problema,” hatete Komisariu Asistente Polísia Agostinho Gomes.

Komandante UEP ne´e mós agradese ba komunidade no joven sira ba kooperasaun,  disiplina no komprensaun durante períodu finadu la halo problema no garante situasaun lao ho hakmatek no diak.

“Situasaun hakmantek hanesan ita infrenta durante period Finadu tanba mós tetude sira ne’ebé mak ita-nia komunidade, ita-nia joventude sira demostra atu kria paz no armonia. Ita presiza situasaun ne’ebé hanesan atu nune’e komunidade ne’e moris hakmatek, moris feliz,” tenik Komandante UEP ne´e.

Komandante UEP hato’o agradese ba família matebian, komunidade, joven hotu no mós ba média sira ne’ebé fó sai informasaun kona-bá alerta PNTL hodi garantia estabilidade no paz to’o loron finadu remata.

Jornalista: Juvinal Cabral dos Santos