Eskola Sekundária iha Teritóriu Nasionál Falta Profesór

Diretór Nasionál Ensinu Sekundáriu Jerál, Benjamin Fernandes.

Díli, 4 Novembru 2026 (RAFA) – Maske Governu halo ona rekrutamentu professor iha tinan 2025-2026, maibé maioria eskola sekundária sira iha teritóriu nasionál sei enfrenta falta profesór ba matéria Língua Portugés, Tetun no Desportu.

Diretór Nasionál Ensinu Sekundáriu Jerál, Benjamin Fernandes hatete Ministériu Edukasaun loke ona vaga, maibe númeru profesór maka la preinxe. Tanba ne’e, tinan oin Ministériu kontinua loke vaga atu hatan ba preokupasaun ne’ebé durante ne’e eskola sira enfrenta.

“Eskola sekundária sira iha territóriu nasionál kuaze laiha profesór ba matéria Língua Portugés, Tetun no Desportu,” Diretór Nasionál Ensinu Sekundáriu Jerál, Benjamin Fernandes, informa, Kuarta-ne’e, iha nia knaar-fatin, Ministériu Edukasaun.

Nia esplika katak rekrutamentu profesór iha tinan oin sei konsidera nesesidade eskola sira nian, inklui atu substitui profesór sira ne’ebé reforma no prienxe matéria sira ne’ebé seidauk iha manorin.

Kona-bá matéria Desportu, Benjamin Fernandes hateten Ministériu Edukasaun sei servisu hamutuk ho Ministériu Ensinu Superior, Siénsia no Kultura (MESSK) no Universidade Nasionál Timor Lorosa’e (UNTL) atu dezenvolve departamentu Desportu iha universidade ne’e, hodi prepara profesór ho kualifikasaun lisensiatura.

“Tuir lei baze edukasaun hatete ema ne’ebé atu hanorin Sekundáriu tenke ho grau Lisensiatura, labele diploma III,” subliña Benjamin.

Maski nune’e, nia esplika ba matéria Desportu, Ministériu Edukasaun sei kontinua fó oportunidade ba profesór sira ho diploma III atu hanorin, enkuantu hein atu iha profesór ho grau lisensiatura.

Iha parte seluk, Adjuntu Diretór Eskola Sekundária Téknika-Vokasionál Eskola Ekonomia no Komérsiu, Fernando Marques, hatete eskola ne’ebé nia lidera atualmente lakon profesór Língua Portugés na’in rua ne’ebé reforma, maibé to’o agora seidauk hetan substituisaun.

“Substituisaun seidauk mai to’o agora, maibé Ministériu hatete ona katak sei iha posibilidade atu halo rekrutamentu iha tempu badak,” haktuir Fernando Marques.

Nia mós propoin atu Ministériu Edukasaun aumenta profesór ba matéria sira seluk, hanesan Multimedia na’in ida, Inglés na’in ida no Língua Portugés na’in rua, hodi responde ba nesesidade eskola nian.

Husi sorin seluk, Diretór Eskola Sekundária Jerál Fitun Naroman Timor Lorosa’e (ESJ-FINANTIL), Aniceto Berlelo, informa eskola ne’ebé nia lidera seidauk iha profesór ba matéria Língua Portugés, Tetun no Desportu, maski iha total profesór na’in-78.

Kona-bá mekanizmu atu asegura estudante sira la lakon direitu atu hetan edukasaun, Aniceto Berlelo esplika katak bainhira eskola falta profesór ba matéria ruma, dala ruma profesór balun voluntariamente oferese an atu hanorin matéria ne’e.

Nia rekomenda ba Ministériu Edukasaun  iha prosesu rekrutamentu profesór tuir mai, fó prioridade ba matéria Desportu, Língua Portugés, Tetun no matéria sira seluk ne’ebé sei menus númeru  profesór.

Jornalista: Cesarina de Carvalho