Lere Anan Timur husu Jerasaun Tuan Sai Ezemplu Di’ak Ba Jerasaun Foun

Asesór Prinsipál Prezidente Repúblika, Tanente Jeneral Reformadu Lere Anan Timur.

Díli, 29 Maiu 2026 (Rafa.tl) – Asesór Prinsipál Prezidente Repúblika, Tanente Jeneral Reformadu Lere Anan Timur, husu  jerasaun tuan sira tenke sai ezemplu di’ak ba jerasaun foun sira hodi kontinua harii nasaun no mantém unidade nasionál.

Tanente Jeneral Reformadu Lere Anan Timur hato’o deklarasaun ne’e iha seminariu nasionál Restaurasaun Independénsia ba tinan-24 iha Universidade da Paz (UNPAZ), Sesta (29/05/2026), hodi afirma tan  jerasaun ne’ebé luta hodi harii independénsia Timor-Leste agora maioria tama ona ba idade 70 no idade 80, nune’e lider sira presiza halo reflesaun kona-bá kontribuisaun ne’ebé halo desde tinan 1975 to’o agora.

“Agora ita iha ona era independénsia, ha’u tama ona ba idade 80. Sa di’ak mak ha’u sei husik ba jerasaun tuir mai ida ne’e. Jerasaun tuan sira tenke fó ezemplu di’ak ba joven sira,” Lere Anan Timur hateten.

Lere mós husu ba jerasaun foun sira tenke aprende no kompriende istória rezisténsia Timor-Leste, liuliu labele minimiza luta rezisténsia ne’ebé lori independénsia ba nasaun.

Nia mós husu ba veteranu no eis-komandante sira atu valoriza malu, tanba se sira rasik la valoriza an, ema seluk mós bele desvaloriza sira.

“Jerasaun foin-sa’e sira tenke hatene istória no konta nafatin hosi jerasaun ida ba jerasaun seluk,”  Lere Anan Timur hateten.

Kona-ba unidade nasionál, Lere dehan katak unidade labele deit haré hosi li’ur, maibé lider sira tenke hatudu unidade liu hosi asaun no relasaun di’ak ba malu.

Nia mós ko’alia kona-bá governasaun atuál ne’ebé lidera hosi Primeiru-Ministru Xanana Gusmão no partidu governu sira, no dehan katak hotu-hotu sei kontinua dezenvolve nasaun tuir kapasidade no realidade ne’ebé iha.

Lere fó ezemplu kona-ba krize iha tinan 1984, bainhira iha diferensa entre lider no soldadu sira, maibé luta ba independénsia kontinua lao ba oin. Nia husu atu esperiénsia ne’e sai lisaun importante ba lider no juventude sira atu kontinua hametin nasaun no unidade nasional.

Jornalista: Marito da Costa/Editór: Vito Salvadór