PCIC Buka Tuir Hela Autór Droga Kokaína Grama 980,5 Importa husi Fransa Mai Timor-Leste

Prova dorga kokaína ne'ebé autoridade sira asegura iha tinan 2025.

Díli, 14 Maiu 2026 (RAFA.tl)- Diretór Nasionál Polísia Sientífika Investigasaun Kriminál (PCIC), Vicente Fernandes e Brito, informa PCIC kontinua halo operasaun no investigasaun hodi buka tuir autór ka rede kriminál ne’ebé involve iha kazu importasaun droga tipu kokaína ho total peso grama 980,5  importa husi Fransa mai Timor-Leste.

“Iha tinan 2025 ita iha prosesu rua kona-bá trafika droga, prosesu ne’e ita investiga ita remete ona rejultadu ba Ministériu Públiku, maibé ha’u ladun akompaña kazu konkretu ne’e, kuandu iha kazu ne’e ita lakonsege identifika arguidu la signifika kazu ne’e taka, ne’ebé Ministériu Públiku kuandu iha períodu Primeiru Interogátoriu seidauk bele halo arkivamentu parsial, bainhira iha loron ida hetan informasaun ba supeitu ne’ebé importa  droga bele halo abertura interna,” Diretór Nasionál PCIC, Vicente Fernandes e Brito  informa ba jornalista sira iha Díli, Kinta (14/05/2026).

Vicente Fernandes esplika bainhira PCIC lori kazu ruma ba iha Ministériu Públiku ne’e tenke iha prova no iha autór, maibe liga ho kazu droga kokaína grama 980,5  sei iha prosesu investigasaun no identifikasaun tanba ne’e ekipa nafatin akompaña ho vijilánsia másimu.

“Ita lori kazu ba Tribunál ne’e la’ós konviksaun moral, maibé konviksaun juridika, se mak komete krime ne’e tenke hatudu prova ne’e ho lolos, kuandu prova ne’e seidauk to’o atu hatete ema ida komete krime, hola responsabilidade iha krime ita prefere halo arkivamentu parsial, signifika  bainhira loron ida prova ne’e hatudu bele halo abertura ba proisesu,”  nia esplika.

Diretór Nasionál PCIC ne’e subliña, kona-bá objetu krime sira ne’ebé importa mai hanesan droga kokaína grama 980,5, seidauk identifika ema ne’ebé atu simu droga ne’e, tanba sei  duvida ba  autor sira ne’e, tanba ne’e sei iha hela prosesu investigasaun.

Iha relatóriu husi  Autoridade Aduáneira (AA), Diresaun Nasionál Operasaun, Departametu Alfándega Aeroportu Internasionál Prezidente Nicolau Lobato  nian ne’ebé Rafa.tl asesu haktuir kronolojia droga tipu kokaína ne’e orijen husi Fransa ho númeru tracking 391202546897 ho nia rute: Fransa-Singapura-Denpasar (Bali)-Díli.

Dokumentu: Air waybill, Tracking number 391202546897, preforma invoice, DAU ho númeru C. 1921 kanal mean, data rejistu DAU, loron  21 fulan-Agostu  tinan 2025.

Merkaduria refere data tracking loron 21 fulan-Jullu tinan 2025 data submete DAU mai ekipa kargu loron 25 fulan-Agostu tinan 2025.

Relatóriu husi  AA, Diresaun Nasionál Operasaun, Departametu Alfándega Aeroportu Internasionál Preizdente Nicolau Lobato revela mós matéria droga ho tipu kokáina ne’e exportador husi FUJIGANG, 13 RUE DE LA GARE FONTENAY-SOUS-BOIS, 9494120 FR-FRANCE no nia destináriu/Consignee ba Timoroan ida hela fatin iha Fatuhada, Díli, ho naran inisiál SdCA no TIN 3959358, Expedisi FEDEX, Declarante Everise Warehousing and Transport, Finansiál  ho naran inisiál DO  ho  SdCA.

Jornalista: João Carlos/Editór: Vito Salvadór