Vise-Ministra Finansa Kestiona Gastu Orsamentu Formasaun no Viajen Estránjeiru Lori Ekipa Boot

Panorama orsamental 2027 iha Ministériu Finasas, Díli.

Díli, 16 Outubru 2026, (RAFA)—Vise-Ministra Finasas, Regina de Jesus, kontesta  esntidade Estadu balun  gasta osan Estadu ba  formasaun no viajen ofisiál ba estranjeiru la tuir nesesidade orsamentu no kapasidade entidade nian.

Iha  aprezentasaun relatóriu ezekusaun Orsamentu Jerál Estadu (OJE) 2026 ba trimestre datoluk, iha salaun Ministériu Finansas, Kinta-ne’e, Vise-Ministra Finansas, Regina de Jesus,  fó ezemplu kona-bá númeru funsionáriu ne’ebé akompaña viajen ofisiál, ne’ebé dala ruma konsidera barak liu kompara ho objetivu no nesesidade atividade nian.

“Funsionáriu na’in haat ka lima ba treinamentu. Maibé, akompañamentu husi sekretáriu diretór nian mós iha tan. Dala ruma, sira uza tempu to’o fulan ida molok fila, ho razaun akompaña de’it. Ida-ne’e estraga osan Estadu,” Vise-Ministra Rejina Sousa lamenta.

Nia husu lideransa entidade públika sira atu asegura katak viajen ofisiál, treinamentu no atividade seluk iha objetivu klaru, tuir nesesidade servisu no disponibilidade orsamentu.

Nia mós apela ba entidade hotu atu hametin kultura desempeñu, responsabilidade no ordenamentu iha jestaun finanseira. Bainhira hasoru difikuldade iha ezekusaun orsamentu, Ministériu Finansa prontu atu fó apoiu no asisténsia téknika.

Vise-Ministra Finasas subliña katak lideransa ida-idak tenke responsabiliza ba rezultadu iha área ne’ebé nia lidera, ho monitorizasaun regulár, meta ne’ebé apropriadu no indikadór ne’ebé bele sukat progresu. Problema ne’ebé identifika tenke rezolve lalais.

Entidade Balu Halibur Reseita Estadu Ba Interese Pesoál

Iha parte seluk, Vise-Ministra Finansas, Regina de Jeus, fó avizu ba entidade públika hotu atu asegura katak reseita Estadu ne’ebé halibur tenke depozita iha konta bankária ofisiál, no labele uza diretamente reseita ne’e atu selu despeza sein tuir regra finanseiru ne’ebé vigora.

Nia afirma katak Ministériu Finansa simu informasaun kona-bá alegasaun iha entidade balu ne’ebé halibur reseita Estadu no uza ba interese pesoál. Nia mós refere ba deteksaun husi Tribunal kona-ba reseita ne’ebé depozita iha konta privadu.

“Informasaun balu ne’ebé ami simu hatudu katak iha entidade balu ne’ebé halibur reseita Estadu ba interese pesoál. Tribunál mós deteta ona reseita balu ne’ebé tau iha konta privadu. Ita tenke husu an rasik, Timor-Leste atu sai saida se prátika hanesan ne’e kontinua”, dehan Vise-Ministra ne’e.

Nia husu entidade públika hotu atu kumpre prosedimentu jestaun reseita Estadu, hametin kontrolu interna no asegura transparénsia iha prosesu halibur, depozita no uza osan públiku.

 Jornalista: Remigia Locatelli