Violénsia Doméstika iha Kuartel Jerál PNTL, Vitíma Inspetora Asistente Polísia

Membru PNTL ida lori suspeitu (la'o hosi kotuk) ba halo identifikasaun iha Unidade Pesoál Vulnerável (VPU).

Díli, 09 Abríl 2026 (RAFA.tl)- Polísia Nasionál Timor-Leste (PNTL) husi Unidade Pesoál Vulnerável (VPU, sigla inglés) halo identifikasaun ba suspeitu ho inisiál VCS tanba halo violénsia doméstika hasoru nia ferik-oan iha  resintu Kuartel Jerál PNTL.

Kazu agresaun fiziku ne’ebé akontese, Kinta (09/04/2026), hale’u tuku 10:00 Otl, iha resintu Kuartel Jerál PNTL ne’ebé envolve suspeitu VCS hanesan katuas-oan hasoru vitíma ho inisiál ODS hanesan membru PNTL ho diviza Inspetora Asistente Polísia ne’ebé kolokadu iha Departamentu Aprovizionamentu PNTL.

Informasaun ne’ebé Rafa.tl rekolla katak suspeitu halo agresaun viziku ba nia ferik-oan  membru PNTL ne’e tanba de’it deskonfia ferik-oan blokeia tiha katuas-oan nia númeru kontaktu. Nune’e, suspeitu telefone dala hirak kedas la bele tama.

Bainhira suspeitu VCS basa vitíma dala-rua ka dala-tolu,  vitíma ODS halai kedas hodi husu ajuda ba nia maluk Polísia sira  asegura suspeitu  VCS no entrega ba Unidade Pesoál Vulnerável (VPU) hodi halo identifikasaun.

Kazu agresaun fízika ne’e rasik, parte Polísia prosesu rejista ona ho NUC : 0128/26.PNSIC kona-bá Ofensa Integridade ba Fízika Simples tuir artigu 146 Kódigu-Penál, no maus tratus ba konjuje artigu 154 Kódigu-Penál, inklui Dekretu-Lei númeru 07/2010 kona-bá violénsia doméstika.

Krime maus-trato (violénsia doméstika) iha Timor-Leste, konsidera nu’udár krime grave ida ne’ebé bele fó kastigu ba suspeitu sira prizaun tuir Kódigu Penál, artigu 154, 155, 156 no Lei Kontra violénsia doméstika (Lei 7/2010). Ida-ne’e inklui violénsia fízika, psikolójika, seksuál, no ekonómika iha agregadu familiár, no polisiál sira iha obrigasaun atu fó protesaun ba vítima.

Tuir Artigu 154 Kódigu Penál nian, violénsia doméstika bele rezulta iha prizaun tinan-ida to’o tinan-lima, dependente ba gravidade no Lei Kontra Violénsia Doméstika (Lei 7/2010) garante apóiu médiku, jurídiku, no seguransa ba vítima.

Violénsia doméstika konsidera hanesan krime públiku, katak Estadu sei prosesa maske vítima hasai keixa. Tanba ne’e autoridade sira husu ba públiku atu kontinua relata kazu violénsia doméstika, tanba problema ne’e presiza atensaun husi parte hotu-hotu hodi halo pevensaun.

Jornalista: João Carlos/Editór: Vito Salvadór