Utiliza Karreta Estadu iha Loron Feriadu, AJAR ho Asosiasaun HAK Husu CAC Investiga APA Liquiça

Administradór Postu Administrativu (APA) Liquiça utiliza karreta Estadu ba tau ai-funan no sunu-lilin iha semitériu públiku. Imajen/reprodusaun

Díli, 05 Novembru 2026 (RAFA)- Asia Justice And Rigths (AJAR) ho Asosiasaun HAK husu  Komisaun Anti-Korrupsaun (CAC, sigla portugés) atu investiga Administradór Postu Administrativu (APA) Liquiça ne’ebé útiliza karreta Estadu iha loron feriadu.

Diretór Ezekutivu AJAR, José Luís de Oliveira, la fiar iha momentu finadu ne’e la’ós de’it Administradór Postu Liquiça mak uza karreta Estadu ba interese privadu, maibé fiar katak iha mós ema seluk inklui funsionáriu baibain mós uza.

“Tuir kódigu penal ne’e krime pekulatu ba uzu, ne’e korrupsaun, uza fasilidade Estadu ba interese privadu. Problema tanba agora daudaun ne’e funsionamentu órgaun Estadu atu kombate asaun krime ne’e sai fraku loos ona, CAC ne’e hanesan kakuak, ibun boot de’it mais la tata,” Diretór Ezekutivu AJAR, José Luís de Oliveira ba RAFA iha nia servisu fatin, Kinta-ne’e.

Nia dehan, Prokuradór Jerál Repúblika mós la haree servisu saida ba kombate, ema la ta’uk halo korrupsaun, ne’ebé agora ne’e rame-rame ema na’ók osan Estadu no Estadu rasik  husik hela de’it.

Nia reforsa, se ko’alia krime pekulatu ba uzu, uza fasilidade Estadu atu servisu ba Estadu komesa kedas husi ulun-boot sira.

Biban ne’e, Diretór Asosiasaun HAK, Feliciano da Costa Araújo husu CAC atu investiga kazu Administradór Postu Administrativu Liquiça ne’ebé uza karretaEestadu iha loron feriadu.

Feliciano husu atu CAC la’ós de’it halo kontrolu ba kazu ida-ne’e, maibé tenke aplika medida rigorozu ba kualkér autoridade ka funsionáriu públiku ne’ebé uza veíkulu Estadu la tuir regulamentu no lei.

“Kualkér autoridade, inklui Prezidente Autoridade Munisipál, Diretór Funsaun Públika ka xefe departamentu ne’ebé uza veíkulu Estadu la tuir tempu no regra, tenke iha asaun rigorozu,”  Feliciano da Costa Araújo konklui.

Prezidente Autoridade Munisípiu Liquiça, Paulino Ribeiro, klarifika ona katak bazeia ba karta pedidu ida mai husi Administradór Postu Liquiça, nia atu uza karreta Estadu n hodi ba partisipa iha missa no halo mós monitorizasaun situasaun durante períodu selebrasaun finadu.

Nia haktuir, iha loron 27 fulan-Outubru iha akontesimentu ida tuda-malu iha área Aipelu, entaun polísia ba halo atuasaun hodi prende tiha samurai ida ho motorizada ida, depois autór sira halai lakon.

“Hanesan Administradór Postu Liquiça nia iha obrigasaun tanba ne’e estensaun kompeténsia teritoriál katak, nia teritóriu ne’e iha problema, entaun haruka karta ida mai iha Diretór Patrimóniu haruka mai ha’u, ha’u aprova no autoriza administradór bele uza iha Sábadu-Domingu maske feriadu atu haree situasaun akontesimentu ida tuda-malu iha loron 27 no loron 28 fulan-Outubru, ita mós lakohi atu akontese tan iha segundu faze,” hatete Paulino Ribeiro.

Nia esplika, tanba iha loron finadu ne’e joven sira hamutuk, sira bele organiza malu entaun bele akontese problema. Tanba ne’e, administradór uza karreta Estadu nian ba observa no tuir missa, karta aprovasaun autoridade númeru referénsia 629.

Jornalista: Cristina Ximenes