PNTL Díli Sei Foti Medida Ba Membru Ne’ebé La Ativu iha Operasaun

Parada enseramentu operasaun konjunta loron finadu, Kinta 5 Novembru 2026.

Díli, 05 Novembru 2026 (RAFA)- Segundu Komandante Polísia Nasionál Timor-Leste (PNTL) Munisípiu Díli,  Superintendente Polísia Luis da Silva,  hateten, durante Finadu situasaun iha kapitál Díli la’o di’ak, maibé Komandu PNTL  sei foti medida no fó sansaun ba membru sira ne’ebé la ativu iha operasaun.

“Atu fó hatene ba ita hotu, enseramentu alerta ida iha ámbitu selebrasaun importante tebes, tanba saida mak ha’u dehan importante, ita halo avalia saida mak ita halo ona ba kotuk no ohin ita atu halo saida no aban atu halo saida. Ita nia operasaun durante loron-hitu nia laran komesa iha loron 29 fulan-Outubru to’o iha loron 04 fulan-Novembru 2026, buat hotu la’o ho di’ak,” hatete Segundu Komandante PNTL Munisípiu Díli, Superintendente Polísia Luis da Silva, iha enseramentu parada operasaun konjunta loron finadu, Kinta-ne’e, iha Komandu Polísia Munisípiu Díli.

Segundu Komandante ne´e hatutan katak kompara ho tinan kotuk, tinan ida ne’e situasaun kondusivu no di’ak liu no halo ema hotu partisipa iha serimonia sira finadu nian, liu-liu kari ai-funa iha semitériu sira ho diak.

Nia informa durante operasaun autoridade seguransa sira halo atuasaun akontese  iha fatin tolu mak iha área Bebonuk grupu balun atake malu ne’ebé konsege rezolve, iha semiteriu Rai-Kotu tenta atu problema Polísia atua, nune’e mós iha parte Becora ninian.

Durante loron hitu akontese kazu tolu de’it, iha kazu seluk maibé laiha ligasaun ho loron finadu. no Komandu Munisípiu Díli mos sei halo preparasaun ba loron 12 Novembru, 28 Novembru, Natál no Tinan Foun sei halo preparasaun di’ak liután.

“Maibé iha membru balun sei iha razaun ida-ne’e ida ne’ebá balun sei falta Komandu sei la tolera halo proposta ba Komandu Jerál hodi loke prosesu ba membru sira ne’ebé mak la involve iha operasaun ida ne’e, se ida-ne’e mak ita husik ba oin ita sei la hatudu buat di’ak. Entaun ida ne’ebé mak badinas, badinas nafatin ida-ne’ebé baruk, baruk nafatin,” nia dehan.

Segundu komandante ne´e informa relatóriu mai husi Komandante Eskuadra sira aprezenta ona ba Komandu Munisípiu no sei hato’o ba Komandu Jerál PNTL mak foti medida ba membru sira ne’ebé la ativu iha tempu operasaun.

Nia subliña, rezultadu ne’e la’ós Komandu PNTL Munisípiu Díli mesak, maibé hetan apoiu husi Konsellu Polísiamentu Komunitária (KPK), Ofisiál Polísia Suku (OPS), Xefe Suku 31 iha Munisípiu Díli inklui apoiu Komandu Jerál, husi Unidade Espesial Polísia (UEP), Unidade Polísia Marítima (UPM), Unidade Patrollamentu Fronteira (UPF) no seluk tan.

Jornalista: Juvinal Cabral dos Santos