Tribunál Hala’o Interogasaun Dahuluk Ba Arguidu Kazu Scam Call Centre Na’in-152

Autoridade sira aprezente arguidu sira ba kazu scam call centre ba Tribunál hodi partisipa interogasaun dahuluk, Sábadu 11 Jullu 2026.

Díli, 11 Jullu 2026 (RAFA.TL), – Ministériu Públiku (MP), Sábadu-ne’e, aprezenta arguidu  ba kazu jogu ilísitu scam call centre hamutuk na’in-152 ba  Tribunál Judisiál Primeira Instánsia Díli (TJPID) hodi partisipa iha interogasuan dahuluk.

Arguidu na’in-152 ne’ebé aprezenta ba Tribunál ho oras la hanesan, kompostu husi argudu na’in-27 mai husi kazu scam call centre ne’ebé polísia detein iha área Matiaut, arguidu na’in-96 detein iha armajen ida iha Bebonuk no arguidu seluk hamutuk na’in-29 detein iha rezidénsia privadu ida iha área Manleuana, Díli.

Arguidu na’in-150 ba kazu ilísitu scam call centre ne’ebé maioria sidadaun estranjeiru husi Xina no Kamboja ne’e, autoridade sira detein liu husi operasaun konjunta iha loron rua tuituir malu, Kuarta-Kinta, 08-09 fulan-Jullu tinan 2026, iha oras ne’ebé lahanesan iha Manleuana, Bebonuk ho Metiaut.

Audénsia interogasaun dahuluk  ba arguidu sira kazu scam call centre iha Metiaut, juiz prosesu José Maria, hatún despaixu hodi aplika médida  tolu bá arguidu sira, mak hanesan aprezentasaun periódika no proibisaun aujénsia ho medida kautelár kausaun ho montante 200 USD  ba kada arguidu.

Medida kautelár ba kausaun ne’e atu garantia kumprimentu obrigasaun ida ka atu kompensa prejuizu posivel sira ba arguido sira iha prosesu legál atu prevene arguidu sira dezvia  husi aksaun prinsipál la’o hela iha Tribunál.

Arguidu sira ne’e, autoridade Polísia aprezenta ba Ministériu Públiku hafoin halo kapturasaun no detensaun tanba deskonfia envolve pratika scam call centre iha rezidénsia ida iha Metiaut, Díli, Kinta 09 fulan-Jullu  tinan 2026.

Iha interogasaun dahuluk iha Tribunál ne’e,  Ministériu Públiku liu husi Prokuradór Rafael Gusmão  promove arguidu sira ho forma krime jogu ilísitu, asosiasaun kriminoza, no burla informátika refleta iha dispozisaun legál ne’ebé  previstu  iha kódigu Penál Timor-Leste.

Advogadu privadu sira ne’ebé  fó asisténsia  legál bá arguidu na’in-27 ne’e, hanesan Otavio Cardoso, Januario Martins, Adelina Mello no José Ximenes, aseita ho alegasaun Ministériu Públiku kona-bá aplikasaun medida  kautelár kausaun, proibisaun  auzénsia ho aprezentasaun periódika.

Arguidu sira ba Kazu Scam Call Centre Bebonuk

 Biban ne’e, autoridade Polísia  ho MP mós aprezenta arguidu na’in-96  ba kazu scam call centre Bebonuk ba iha interogasaun dahuluk iha Tribunál.

Polísia Sientífika Investigasaun Kriminál (PCIC-sigla portugés) transporta arguidu na’in-96 ho karreta bis ida hodi tula dala-tolu ba hatuun iha resintu Tribunál Judisiál Primeira Instánsia Díli (TJPID) hodi submete ba justisa tuir lei mak vigora.

Molok  atu tama iha julgamentu interogasaun dahuluk nian, ekipa PCIC kaer lista hodi bolu  no identifika didi’ak arguidu sira  nia identidade.

PCIC  servisu  hamutuk ho Servisu Nasionál Intelijénsia (SNI) halo operasaun no detensaun ba arguidu na’in-96 ne’e  iha Kuarta-kalan, 09 fulan-Jullu 2026 tanba  deskonfia forte hala’o atividade ilísitu scam call centre.

 Arguidu Na’in-29 Kazu Scam Call Centre  Manleuana 

Iha Sábadu-ne’e, autoridade Polísia ho Ministériu Públiku aprezenta mós arguidu  na’in-29 ne’ebé envolve iha kazu jogu ilísitu scam call centre iha Maneluana ba TJPID hodi partisipa interogasaun dahuluk.

Molok hahú interogasaun ne’e, Tribunál hala’o uluk identifikasaun ba arguidu sira  hodi konfirma sira-nia identidade.

Ministériu  Públiku ne’ebé reprezenta husi  Prokuradór Domingos Goveia,  promove  krime haat ba arguidu sira, mak hanesan krime asosiasaun kriminozu, brankeamentu kapitál, burla informátika no  jogu ilísitiu.

Prosesu interogasaun dahuluk iha TJPID ne’e prezide  husi Juiz José Gonçalves,  Ministériu Públiku reprezenta husi Prokuradór Domingos Goveia no arguidu na’in-29 hetan asisténsia husi advogadu privadu Pedro Camões ho   Defensor Públiku.

Arguidu na’in-29 ne’e PNTL ho Servisu Migrasaun halo kapturasaun iha Kuarta, 08 fulan-Jullu 2026, hale’u tuku 11:00 Otl,  iha rezidensia ida iha Manleuana.

Jornalista: João Carlos/Editór: Vito Salvadór