Tribunál Aplika Medida Diferensa Ba Arguidu Na’in-Rua Kazu Droga

Arguidu kazu droga ne'ebé hetan medida koasaun prizaun preventiva konsulta ho nia advogadu hafoin Tribal hatun despaixu primeira interogatóriu, Kuarta-kalan, 30 Setembru 2026.

Díli, 30 Setembru 2026 (RAFA) –Tribunál Judisiál Primeira  Instánsia Díli (TJPID), liu-husi Julgamentu Primeiru Interogátoriu,  Kuarta-ne’e,  hatún despaisu hodi aplika  medida koasaun prizaun preventiva bá arguidu no medida koasaun aprezentasaun periodika bá arguida ne’ebé  deskonfia komete trafiku ilísitu droga tipu  antefemenia ho metafeminia iha área Fomento ho  Manleuana, Díli.

Iha audénsia julgamentu primeiru interogátoriu ne’ebé Tribunál ajenda iha loron ida antes, Ministériu Públiku reprezenta Prokuradór Matias Soares, kondena arguidu sira ho krime trafiku  ilísitu droga    bazeia bá Artigu 7, 8 no  9 husi lei númeru 2/2017 kona-bá kombate tráfiku no konsumu ilísitu bá droga.

Durante julgamentu primeiru interogatóriu ne’e, arguidu konfensa  bá Tribunál katak  nia konsumu duni droga. Maske nune’e, arguidu deklara   katak iha Domingu foin lalais ne’e, ho karreta la’o hela derrepente de’it, autoridade seguransa korta no hapara nia,  hodi husu bá arguidu katak saída maka iha karreta laran no autoridade haruka arguidu ne’e loke karreta.

Arguidu loke karreta haré buat ida laiha, tanba ne’e autoridade  seguransa sira tau alzema bá arguidu hodi ezije bá nia rezidensia.

Bainhira   to’o rezisténsia maka  foin hetan objetu  sira ne’ebé deskonfia iha relasaun bá droga  no mós ho osan.

Parte seluk, arguida deklara bá Tribunál katak, nia  konsumu no iha teste uriña hetan negativu.

Hafoin rona tiha arguidu sira Tribunál  fó  tempu bá Ministériu Públiku ho advogadu  sira ne’ebé fó asistensia legál bá arguido ho arguida atu halo kontestasaun.

Prokuradór Matias Soares konsidera arguidu na’in-rua iha indísiu forte bá  prátika krime  tráfiku no konsumu droga, no bazeia bá teste uriña bá arguidu pozitivu.  Tanba ne’e iha alegasaun Prokuradór Matias Soares solita bá Tribunál atu aplika medida koasaun Prizaun Preventiva bá arguidu no aprentasaun periódidika bá arguida, atu nune’e,  bele garantia prosesu konstrusaun bá investigasaun.

Advogadu privadu Otávio Cardoso ho Januário Martins  haré katak seidauk iha indísiu forte,  tanba ne’e sira husu Tribunál atu aplika medida ne’ebé adekuadu bá sira nia kliente.

Sira husu tribunál  atu  atu aplika médidia koasaun aprezentasaun periódika ho proibisaun aujénsia. Nune’e mós  husu tribunál aplika medida kausaun bá arguidu na’in-rua, valór kausaun  tetu tuir Tribunál nia intendimentu.

Rona tiha alegasaun ne’e, husi Ministériu Públiku ho Asistensia legál sira, Tribunál liuhusi Juíz prosesu José Maria konsidera  katak arguidu iha indísiu forte, nune’e aplika Prizaun Preventiva.

Enkuantu arguida, tribunál aplika medida koasaun aprezentasaun periódika, semana rua dala ida  iha tribunál.

Hafoin Tribunál halo tiha letura bá despaisu hodi aplika Prizaun Preventiva bá arguidu,  advogadu ne’ebé fó asistensia legál bá arguidu sira sei rekorre rekursu  dentru semana ida nia hodi kontra despaisu tribunál nian.

Fó hanoin fali katak operasaun  flagrante delitu  iha Domingu, foin lalais ne’e,  PCIC konsege halo apreensaun osan cash hamutuk  US$14.900 no Rp.2.904.000 ne’ebé suspeita katak mai husi atividade fa’an droga, hamutuk ho mina metanfetamina 300 mililítru no metanfetamina kristál grama sia ho telemovel lima.

Hafoin halo detensaun, PCIC halo teste inisiál ba substánsia sira ne’ebé apreende durante operasaun,  rezultadu teste inisiál hatudu pozitivu bá substánsia droga anfetamina no metanfetamina.

Jornalista: Marcelino Tomae/Juvinal Cabral dos Santos