Tribunál Aplika Pena Suspensaun Tinan-Ida Bá Arguidu Na’in-Neen Kazu Uza Veíkulu Estadu Ba Fins Privadu

Funsionáriu Públiku sira detein iha sela CAC tanba suspieta ba krime pekulatu ba uzu, Tersa 25 Agostu 2026.

Díli, 31 Agostu 2026 (RAFA) – Tribunál Judisiál Primeira Instánsia Díli (TJPID), Segunda-ne’e, liu-husi Juiz José Escurial, halo leitura desizaun aplika pena prizaun fulan-neen  no suspende ba tinan-ida, ba funsionáriu públiku na’in-neen (6) ne’ebé sai argiudu ba  kazu  utilizasaun veíkulu Estadu iha loron feriadu sein karta autorizasaun.

Desizaun ne’e Tribunál hatun hafoin tetu akuzasaun Ministériu Públiku (MP) ne´ebé  akuzada arguidu  na’in- neen kona-bá krime pekulatu ba uzu, ne’ebé previstu no punidu tuir Artigu 83.º Lei N.º 7/2020, 26 Agostu, kona-ba Medida Prevensaun no Kombate Korrupsaun.

Veíkulu Estadu sira ne’ebé arguidu  sira utiliza ba benefisiu pesoal mak hanesan motorizada Honda Verza ho matríkula 7151-G, Honda Verza ho matríkula 5239-G, Yamaha XTZ 150 ho matríkula 4536-G, Honda Supra X-125 ho matríkula 7826-G, Ford Ranger ho matríkula 04-852-G, no Toyota Hilux ho matríkula 03-318-G.

Ministériu Públiku  solisita ba Tribunál atu konsidera akuzasaun ne’e ho baze ba sirkunstánsia no elementu sira ne’ebé aprezenta iha autos.

Defensór Públiku Manuel Amaral husu Tribunál atu tetu no konsidera sirkunstánsia sira ne’ebé previstu iha Kódigu Penál antes halo desizaun.

Depois rona parte hotu, Tribunál konsidera katak iha indísiu forte kona-bá envolvimentu arguidu sira iha krime pekulatu ba uzu,  nune’e, Juiz José Escurial, aplika pena prizaun  fulan-neen,  suspende bá  tinan ida

Tribunál mós  bandu arguidu sira atu la komete krime seluk durante períodu pena suspensaun.

Prosesu sumáriu ne’e prezide hosi Juiz José Escurial, Ministériu Públiku reprezenta hosi Prokuradór João Marques, enkuantu arguidu na’in neen hetan asisténsia hosi Defensór Públiku no advogadu privadu.

Jornalista: Marcelino Tomae