Tribunál Aplika Medida Tolu Ba Arguidu Na’in-hitu Ba Kazu Hatama Sigaru Ilegál

Prova sigaru ilegál ne'ebé arguidu sira hatama ho ró ida iha tasi área Baucau nian, foin lalais ne'e.

Díli, 29 Jullu 2026 (RAFA.TL) – Tribunál Judisiál Primeira Instánsia Díli (TJPID),  Kuarta-ne’e, realiza prosesu interogatóriu dahuluk ba arguidu na’in-hitu ne’ebé hatama sigaru ilegál ho kuantidade hamutuk karton 2.583.

Arguidu na’in-hitu ne’e kompostu husi na’in- lima sidadaun Myanmar no na’in-rua  Xinés, ne’ebé autoridade sira detein iha área tasi Munisípiu Baucau, Segunda foin lalais ne’e.

Ministériu Públiku (MP) akuza arguidu sira ho krime kontra bandu no deskamiñu, tuir dispozisaun legál ne’ebé previstu iha Kódigu Penál Timor-Leste.

Iha prosesu interogatóriu dahuluk, Ministériu Públiku husu ba Tribunál atu aplika medida koasaun Prizaun Preventiva (PP) ba arguidu na’in-hitu, ho razaun katak arguidu sira uza ró ilegál hodi hala’o operasaun hatama merkadoria ilegál iha Timor-Leste.

Parte defeza ne’ebé fasilita asisténsia legál ba arguido sira la konkorda ho pedidu Ministériu Públiku nian no husu Tribunál atu aplika medida koasaun Aprezentasaun Periódika (AP) no Proibisaun Auzénsia (PA) ba arguidu na’in-neen, no ba arguidu ida seluk aplika medida koasaun Termu Identidade no Rezidénsia (TIR).

Defeza argumenta katak detensaun ba arguidu ida ne’ebé sira-nia parte husu medida TIR ne’e  la tuir prosedimentu legál tanba akontese iha kondisaun ne’ebé konsidera la’ós flagrante delitu.

Hafoin rona alegasaun husi Ministériu Públiku no argumentu husi parte defeza, Tribunál liuhusi Juiz José Quintão deside aplika medida koasaun Aprezentasaun Periódika (AP) no Proibisaun Auzénsia (PA) ba arguidu estranjeiru na’in neen. Enkuantu arguidu ida seluk hetan medida koasaun Termu Identidade no Rezidénsia (TIR).

Prosesu interogatóriu dahuluk ne’e prezide hosi Juiz prosesu, José Quintão, Ministériu Públiku reprezenta husi Prokuradór Matias Soares, no arguidu na’in-hitu hetan asisténsia legal husi advogadu privadu Napoleão de Oliveira Carvalho.

Jornalista: João Carlos