Tribunál Aplika Medida Koasaun Aprezentasaun Periódika Ba Polísia Falsu Na’in-Rua

Polísia Nasionál Timor-Leste (PNTL) detein polísia falsu na'in-rua iha sela, Kinta-kalan, 23 Jullu 2026.

Díli, 27 Jullu 2026 (RAFA.TL) – Tribunál Judisiál Primera Instánsia Díli (TJPID)  liuhusi  prosesu primeiru interogatóriu, Domingu-ne’e, hatun despaixu ikus hodi aplika medida koasaun aprezentasaun  periódika  ba arguidu Polísia falsu na’in-rua ne’ebé kobra osan iha Xinés ida ho montante US$22,000.00.

Notísia Relevante: PNTL Kaptura Polísia Falsu Na’in-Rua Kobra Suspeitu Xinés Ida ho Montante US$22,000.00

Iha  prosesu primeiru interrogatóriu,  Ministériu Públiku promove arguidu polísia falsu na’in-rua ne’e  ho krime burla informatika.

Iha alegasaun, Ministériu Públiku solisita ba iha Tribunál atu aplika medida Termu Indentidade Rezidénsia (TIR) ho aprezentasaun periódika (AP). Nune’e, parte Defeza mós aseita  ho alegasaun ne’e.

Rona tiha parte sira, Tribunál deside hodi aplika medida koasaun aprezentasaun periódika  ba arguidu na’in-rua hodi aprezenta an iha Eskuadra Polísia ne’ebé besik, kada semana, dala-ida.

Polísia falsu na’in-rua ne’e, autoridade sira detein iha Kinta-kalan, 23 fulan-Jullu ne’e, bainhira hala’o negosiasaun ho Xinés ida hodi husu osan ka kobra osan ho montante US$22,000.00.

Arguidu na’in-rua ne’e aprezenta an ba Xinés ne’e katak sira na’in-rua polísia no sira mak atende kazu Xinés nia maluk na’in-21 ne’ebé autoridade sira  halo detensaun tanba deskonfia envolve iha rede scam call centre iha Hera.

Arguidu Polísia falsu na’in-rua ne’e garante no kompromete ba Xinés ne’e katak bainhira nia fó osan ho montante ne’ebé sira husu, maka sira na’in-rua sei hasai Xinés ne’e nia maluk sira iha sela detensaun, inklui hasai nia naran husi lista Polísia nian iha kazu scam call centre.

Xinés ne’ebé polísia falsu na’in-rua kobra ne’e, deskonfia parte ida husi rede scam call centre ne’ebé halai ses husi operasaun Polísia Nasionál Timor-Lete (PNTL), foin lalais ne’e, iha área Hera.

Jornalista: João Carlos