Tribunál Aplika Medida Kausaun US$3,000 To’o US$5,000 Ba Arguidu Na’in-haat Kazu Scam Call Centre iha Garden Beach

Arguidu sira kazu scam call centre iha Otél Garden Beach.

Díli, 14 Setembru 2926 (RAFA) — Tribunál Judisiál Primeira Instánsia Díli (TJPID), Domingu-ne’e, aplika medida kausaun US$5,000  ba arguidu na’in-ida no arguidu na’in-tolu seluk US$3,000 ho proibisaun aujénsia tanba akuzadu bá kazu scam call centre iha Otél Garden Beach.

Arguidu sira ne’e  Polísia Nasionál Timor-Leste (PNTL), liu-husi Diresaun Servisu Investigasaun Kriminál (DSIK),  detein hamutuk ema na’in-12 iha   9 fulan-Setembru 2026, iha Otél Garden Beach.

Arguidu sira-ne’e kompostu husi sidadaun Xinés na’in-ualu (8) no sidadaun Taiwan na’in- haat.

Durante audénsia, Ministériu Públiku, liu-husi Prokuradór Domingos Goveia Leite, akuza arguidu na’in-haat ho krime haat, mak asosiassaun kriminoza, burla informátika, esplorasaun jogu ilísitu no brankeamentu kapitál.

Iha alegasaun, Prokuradór Domingos Goveia Leite husu Tribunál atu aplika medida prizaun preventiva, ho konsiderasaun katak arguidu sira suspeitu iha envolvimentu ho atividade scam call centre no prosesu investigasaun sei kontinua. Maibé, advogadu privadu Sergio Gama Lobo da Silva Júnior, Luís Marcelo no Agustinho de Jesus, ne’ebé fó asisténsia legál ba arguidu sira, husu Tribunál atu labele aplika prizaun preventiva.

Advogadu sira  solisita ba  Tribunál aplika medida  koasaun prebuisaun aujénsia, aprezentasaun periódika, no propoin osan kausaun US$2,500 ba kada arguidu.

Depois konsidera alegasaun husi Ministériu Públiku no defesa,  Tribunál  liu-husi Juiza Novela Alberto Pereira haree katak Minitériu Públiku la aprezenta prova ne’ebé forte  nune’e deside despaisu  aplika medida kausaun  US$5,000 ba arguidu ida no US$3,000  bá  kada arguidu na’in-tolu seluk.

Tribunál mós fó prazu loron 20 bá arguidu  na’in  haat hodi selu kausaun tenke selu US$14.000 Iha Tribunál ka Minitériu públiku.

Jornalista: Marcelino Tomae/ Juvinal Cabral dos Santos