TL Sei Asina Deklarasaun Estabelesimentu Relasaun Diplomátika ho Governu Estadus Federadus Mikronézia

PM Xanana Gusmão lidera reuniaun Konsellu Ministru, Kuarta 3 Juñu 2026.

Díli, 03 Juñu 2026 (RAFA.TL)- Governu liu hosi desizaun reuniaun Konsellu Ministru, Kuarta (3/06/2026),  fó podér tomak ba Embaixadora Timor-Leste ba Komunidade Austrália, Inês Maria de Almeida, hodi asina deklarasaun intensaun ba Estabelesimentu Relasaun Diplomátika entre Governu Repúblika Demokrátika Timor-Leste no Governu Estadus Federadus Mikronézia nian.

Iha komunikadu ne’ebé Rafa.tl asesu, kofirma katak objetivu atu formaliza estabelesimentu relasaun diplomátika entre nasaun rua ne’e, tuir prinsípiu sira husi Karta Nasoins Unidas no Konvensaun Viena nian kona-bá Relasaun Diplomátika, loron 18 fulan-Abríl tinan 1961.

“Desizaun ne’e reflete interese mútua Timor-Leste no Estadus Federadus Mikronézia nian atu hametin lasu amizade no kooperasaun bilaterál, hodi kontribui ba hametin dame no seguransa internasionál, bazeia ba prinsípiu igualdade entre Estadus, soberania nasionál, independénsia, integridade territoriál no laiha interferénsia ba asuntus internus.” Rafa.tl sita komunikadu.

Konsellu Ministrus fó apoiu ba asinatura memorandu entendimentu rua entre Timor-Leste no Repúblika Sosialista Vietname iha área edukasaun no ensinu superiór.

Akordu sira ne’e ho objetivu atu hametin kooperasaun bilaterál liuhosi promove parserias entre instituisoins ensinu no peskiza, interkámbiu estudantes, dosentes, no espesialistas, fahe prátika no esperiénsia edukativa sira ne’ebé di’ak, dezenvolvimentu programas formasaun no peskiza nian, no mós promosaun oportunidades ba bolsa estudu, depende ba disponibilidade rekursus hosi parte rua.

Memorandu entendimentu iha área edukasaun sei asina hosi Ministra Edukasaun, Dulce de Jesus Soares, no Ministra Edukasaun no Formasaun Profisionál Vietname nian. Memorandu entendimentu iha área ensinu superiór, siénsia, no kultura sei asina hosi Vise Primeiru-Ministru no Ministru Ensinu Superiór, Siénsia no Kultura ein-ezersísiu, Mariano Assanami Sabino. Akordu rua ne’e sei asina hosi Ministru Edukasaun no Formasaun Vietname nian.

Jornalista: Remigia Locatelli/Editór: Vito Salvadór