Timoroan Na’in-Rua Sei Simu Sentensa Ba Kazu Violasaun Iha Irlanda do Norte

Timoroan na’in-ida husi sira na'in-rua ne’ebé tribunál deklara ona sala ba krime violasaun iha sidade Dungannon, Irlanda do Norte.

Dungannon, 28 Jullu 2026 (RAFA.TL) – Foin-sa’e Timoroan na’in-rua ne’ebé tribunál deklara ona sala ba krime violasaun iha sidade Dungannon, Irlanda do Norte, sei simu sentensa iha semana sira oin mai.

Sentensa ne’e sei sai hafoin besik tinan tolu hosi akontesimentu ne’ebé sira ataka no viola feto ida iha parkeamentu ida iha rai-okos iha sidade ne’e.

Juíz Richard Green, hosi Tribunál Koroa Dungannon, ordena atu fó prioridade ba prosesu ida ne’e. Nia dehan katak, bainhira iha oportunidade iha kalendáriu tribunál nian, kazu ne’e tenke lori kedas ba oin atu fó desizaun finál. Informasaun ida ne’e publika hosi portal notísia britániku Crime World.

Luis dos Martins Mariano, agora tinan 19, no Alcino Soares, ho tinan 20, ne’ebé hela iha Dungannon, akuzadu katak iha kalan 10 fulan-Setembru 2023 sira hakbesik ba feto foin-sa’e ida ne’ebé foin fila hosi enkontru ho nia kolega sira.

Tuir rezultadu investigasaun, sira hamrík hale’u vítima, depois lori nia ba parkeamentu mamuk ida iha rai-okos.

Tuir deklarasaun hosi membru Polísia ida ne’ebé fó iha tribunál, durante akontesimentu ne’e, ida hosi arguidu sira halo violasaun ba vítima, enkuantu ida seluk hamriik hein no asisti akontesimentu ne’e ho atitude ne’ebé hatudu katak nia sente kontente.

Polísia mós dehan katak, iha momentu nebá vítima la hatudu reasaun ida no hanesan ema ne’ebé lakon konsiénsia ka la hatene saida mak akontese ba nia. Fonte ne’e kompara nia kondisaun ho boneka ida ne’ebé la iha forsa atu bok an.

Alcino Soares identifikadu hafoin polísia hakbesik ba nia iha loron 23 fulan-Setembru 2023. Iha tempu ne’ebá, polísia simu ona keixa hosi komunidade katak dalabarak nia tuir no grava [ persegue no filma] feto sira ne’ebé la’o iha dalan.

Bainhira polísia halo revista ba nia uma, sira hetan telemóvel hamutuk sanulu. Aleinde ne’e, rezultadu teste ADN ne’ebé hetan iha roupa vítima nian hatudu katak ADN ne’e kompatível ho Alcino Soares.

Teste ADN iha kazu violasaun mak ezame siéntífiku ida ne’ebé buka no kompara dadus jenétiku hodi komprova ema ne’ebé halo krime, liuhusi aprezu dezajen fíziku hanesan raan, śemen, ka kulit ne’ebé husik hela iha vítima nia isin ka roupa.  Teste ne’e ajuda tribunál hatene loloos sé mak sala.

Iha Marsu 2025, Luis Dos Martins Mariano, admite iha tribunál katak nia sala ba krime violasaun.

Alcino Soares, iha inísiu, kontinua rejeita akuzasaun no dehan ba polísia katak nia la halo violasaun. Maibé, iha Outubru 2025, nia muda nia pozisaun no admite sala ba krime rua kona-bá violasaun.

Maski nain-rua ne’e admite ona sala, maibé leitura sentensa dalabarak adia. Uluk, tanba alegasaun katak ida hosi arguidu nia la komprende lian Inglés ho di’ak. Depois, prosesu ne’e adia tan tanba greve advogadu kriminál sira iha Reino Unido ne’ebé protesta hasoru valor osan apóiu jurídiku ne’ebé governu selu ba sira. Greve ne’e dura besik fulan neen no halo prosesu barak iha Tribunál Koroa para ka suspende hela.

Tuir portal Crime World, Juíz Richard Green husu ba Ministériu Públiku atu garante katak kazu ne’e rezolve ho lalais, tanba vítima hein justisa besik ona tinan tolu, no atrazu ne’e bele aumenta tan sofrimentu ne’ebé nia hasoru.

Ministériu Interior britániku (Home Office) konfirma ba Crime World katak, hafoin sira hotu kumpre pena prizaun ne’ebé tribunál determina, ema na’in-rua ne’e sei deporta husi Reinu Unidu.

Remata