Timor-Leste Sei iha Kooperasaun Triparti Ba Reforsa Área Ekonómia no Negosiu

Prezidente The Japaun-Austrália Business Co-operation Commitee, Michiaki Hirose hasoru malu ho PM Xanana Gusmão iha Palásiu Governu, Tersa 12 Maiu 2026

Díli, 12 Maio 2026 (RAFA.tl)- Prezidente The Japaun-Austrália Business Co-operation Commitee, Michiaki Hirose, hateten sei serbisu hamutuk ho Timo-Leste ba kooperasaun triparti hodi Reforsa dezenvolvimentu área prinsipál sira hanesan ekonómia no negosiu iha futuru.

Prezidente Japaun-Austrália Business Co-operation Commitee, Michiaki Hirose, ba jornalista sira iha Palásiu Governu, Díli, Tersa (12/05/2026), hateten haksolok tebes hasoru Primeiru-Ministru Kay Rala Xanana Gusmão hodi ko’alia kona-bá relasaun nasaun rua nian iha area ekonómia no negosiu nian.

“Ohin, kontente tebes atu hasoru Primeiru-Ministru hodi ko’alia kona-bá relasaun nasaun Japaun no Timor-Leste liu-liu iha área ekonómia nian.  Ami hato’o interese atu loke formasaun kona-bá negósiu iha Timor-Leste,” Michiaki Hirose hateten.

Michiaki Hirose hatutan desde uluk kedas japaun no Timor-Leste iha relasaun ne’ebé forte iha área negosiu nian tanba ne’e kontinua halo nafatin koperasaun atu apoiu dezennvolvimentu no hasa’e kreximentu ekonómiku Timor-Leste nian iha futuru.

“Ha’u nu’udar prezidente komite kooperasaun Austrália nian ha’u rona katak Timor-Leste ho japaun sira iha relasaun ne’ebé forte tebes iha área negosiu nian tanba ne’e ha’u hakarak reforsa kooperasaun ida ne’e entre Japaun, Austrália no Timor-Leste iha Futuru,” Nia subliña.

Prezidente The Japaun-Austrália Business Co-operation Commitee ne’e mós haktuir katak sei iha oportunidade barak ne’ebé nasaun rua bele explora iha futuru konserteza iha área balun inklui enerjia iha futuru.

The Japaun-Austrália Business Co-operation Commitee Estabelese ho vizaun jerál ida maka promove no hasa’e oportunidade negósiu no hametin ligasaun entre Austrália ho Japaun bá benefísiu membru sira no mós komunidade internasionál.

Harii iha tinan 1962 atu promove liu-tán kooperasaun entre nasaun rua no sira nia komunidade emprezariál sira.

Iha enkontru entre Primeriu-Ministru Kay Rala Xanana Gusmão ho Prezidente Japaun-Austrália Business Co-operation Commitee, Michiaki Hirose Chairman, ne’e akompaña mós husi Embaixadór Japaun iha Timor-Leste Yayushi Yamamoto.

 Jornalista: Elio dos Santos/Editór: Vito Salvadór