DNTM Sei Halo Inspesaun Ba Ró Lazu-Lazu ho Mel Soraia

Ró Lazu-Lazu

Díli 15 Jullu 2026 (RAFA.TL)- Diresaun Nasionál Transporte Marítima (DNTM) sei halo inspesaun anual ba ró Lazu-Lazu  ho Mel Soraia hodi hatene kondisaun no docking list hodi garante seguransa ema nian iha tasi laran.

Xefe Departamentu Seguransa Marítima, José Madeira Marques, ba Rafa.tl  iha Portu Díli, Tersa-ne’e,  informa, DNTM nia papel maka atu halo inspesaun ba ró sira ne’ebé maka halo operasaun iha tasi. Nune’e, karik iha difisiensia ruma ne’ebé DNTM identifika sei relata fali ba empreza transportadora Marítima (Kompañia Ró)  no Ró nain (Ship owner), sira hodi bele prepara doking list sira ne’e.

“Ship owner sira rasik maka sei prepara docking list hodi halo planu ba anual doking ne’e, Ró ahi ne’e atu lori ba docking (manutensaun) iha nasaun ne’ebé, ne’e depende ba Ró ahi na’in rasik atu haré kona-bá crew iha Ró ahi leten ne’e, ita bazeia ba konvensaun internasionál Marítima nian, sertifikadu sira ne’e, tuir duni rekerementu husi konvensaun internasionál kalae, bainhira iha inspesaun ne’e ami sei haré ba parte tekniku, no ekipamentu sira, inklui komunikasaun sira.’’ Xefe Departamentu Seguransa  Marítima José Madeira Marques informa.

Nia  hatutan, DNTM prepara ona anual inspesaun ba Ró ho marka Mel Soraia  ho Laz-lazu 1 no 2, hodi nu’uné hato’o ba Diretór no Ship owner sira hodi bele halo verfikasaun ba ró sira ne’ebé maka iha problema sira presiza  ba halo docking molok Ró refere halo operasaun normal iha tasi.

“Ami iha planu halo inspesaun anual hodi rekomenda ba Ró nia nain atu kumpri buat ne’ebé ami nia tekniku sira ba halo inspesaun, hetan problema ruma tenke rekomenda depois tenke ba hadia, sekarik iha tripulante balu maka dokumentu laiha, ami mós rekomenda ba sira hodi kompleta dokumentu, depois maka ami nia rekomendasaun sira ne’e la kumpri, ami sei bolu sira fó notifikasaun, liu husi notifikasaun maka sira kontinua la kumpri maka ami hapara sira nia atividade,” Helder Silva hateten.

Tuir rekizitu husi DNTM  katak Ró Laju-Laju no mós Mel Soraia nia docking list ne’e tinan ida ekipa halo inspesaun dala ida tuir regular inspesaun no tuir dadus ne’ebé maka parte DNTM rejistu kona-bá Ró Mel Sorai ne’e ship owner husi Mato Shipping Company no mós Laju I husi Versado Kompany Agency no Ró rua ne´e husi estranjeiru no seidauk sai Timor nian, tanba  sei utiliza  Bandeira husi Indonézia no mos Malázia.

Tuir dekretu lei nú.12/2023 no mós dekretu lei nú 14/2023, katak DNTM iha kna’ar atu halo inspesaun ba Ró sira ne’ebé halo opersaun iha teritoriu nasionál tuir simbolu Bandeira (Flag statte) nasaun ne’ebé fó rejistu ofisiál ba ró-tasi ida no fó direitu atu uza nasaun ne’e nia bandeira. Bazeia ba Tratadu ka Konvensaun Internasionál ne’ebé importante liu hotu kona-bá Seguransa ba Moris Ema nian iha Tasi laran.

 Jornalista: Remigia Locatelli/Editór: Vito Salvadór