Suspeitu Na’in-Rua Ba Kazu Hadau Karteira iha Praia Coqueiros Sempre Halo Asaun Naok iha Díli Laran

Suspeitu na’in-rua ba kazu hadau karteira iha Praia Coqueiros, Díli to’o rezulta vitima Nadie lakon vida nu’udar autór ne’ebé sempre halo asaun naok iha kapitál Díli.

Díli, 09 Juñu 2026 (RAFA.TL)- Polísia Nasionál Timor-Leste (PNTL)  identifika no deskobre, katak  suspeitu na’in-rua ba kazu hadau karteira iha Praia dos Coqueiros, Díli,  Domingu (07/06/2026), to’o  rezulta vitima Nadie lakon vida nu’udar autór ne’ebé sempre halo asaun naok iha kapitál Díli.

Porta-vóz Komandu Jerál PNTL, Superitendente Xefe Polísia João Belo dos Reis, ba jornalista sira, Tersa (09/06/2026), hatete, suspeitu na’in-rua ne’e  ekipa Polísia kaptura iha área BTN 3, Tasi –Tolu, ho evidénsia motorizada ne’ebé suspeitu sira utiliza hodi halo asaun hadau karteira no telemovel.

“Suspeitu na’in-rua ne’e mós halo asaun naok loron tolu antes iha loja Grasia-Kampung Baru nia kotuk. Motorizada ne’ebé sira na’in-rua uza hodi naok ka hadau karteira no telemovel iha área Praia dos Coqueiros, ne’e mós sira naok kalan tolu antes,” Superitendente Xefe Polísia João Belo dos Reis informa.

Porta-vóz Komandu Jerál PNTL ne’e hateten, suspeitu na’in-rua ne’e hanesan autór ne’ebé hadau beibeik ema nia sasan, ikus maka hadau iha Praia dos Coqueiros hodi rezulta vitíma Nadine lakon vida no vitíma nia bin rasik kanek grave.

“Prosesu sira-ne’e ita sei akumula aprezenta hotu ba Tribunál, agora dadauk sira iha ami nia liman iha detensaun sela  oras 72, depois ami sei submete ba Tribunál,” Superitendente Xefe Polísia João Belo dos Reis informa.

PNTL rejista ona kazu suspeitu na’in-rua ne’e ho Númeru Uniku Krime (NUC), 0206/2026 PNSIK, no kontinua husu ba Ministeriu Públiku atu halo despaixu mai PNTL atu kontinua buka tuir ema ne’ebé envolve iha grupu Naok-ten Hakmatek (NAHAK).

Porta-vóz PNTL husu ba públiku liliu ba sira ne’ebé sente motór lakon iha loja Gracia nia kotuk iha loron tolu liubá atu hakat ba iha Komandu Jerál PNTL lori ho dokumentu komprovativu sira hodi haré motór sira ne’e no foti fila fali.

Jornalista: João Carlos/Editór: Vito Salvadór