Segunda Divizaun LFTL, Nagardjo F.C Empata ho Fiel F.C ho Score 1-1

Nagardjo F.C Empata ho Fiel F.C ho Score 1-1.

Díli, 04 Juñu 2026 (RAFA.TL)– Ekipa Nagardjo F.C no Fiel F.C obrigadu tenke fahe pontu hanesan tanba empata ho score 1-1 iha jogu kontinuasaun Liga Futeból Timor-Leste (LFTL), segunda divizaun époka 2026.

Jogu kontinuasaun ba Liga Timorense Époka 2026, segunda divizaun entre Nagardjo F.C no Fiel F.C, ne’ebé hal’ao iha Estádiu Munisipál Díli, Kuarta (03/06/2026), ekipa rua ho ambisaun hanesan hakarak mantein iha zona leten tabela klasifikasaun grupu A.

Ekipa rua halo jogu ida atrativu tanba ekipa rua hanesan ekipa ne’ebé iha oportunidade boot atu ultrapasa klubu sira seluk iha grupu A segunda divizaun, tanba ne’e, dezde jogu primeira parte ekipa rua lansa kedas kontra atake ba malu hodi hadau oportunidade atu lidera uluk score iha tabela.

Tama ba minutu sia Nagardjo F.C hetan uluk oportbuidade osan-mean hodi marka golu ba nia adversáriu Fiel F.C liu husi jogadór Yohan Woppi hodi muda score ba 1-0.

Hafoin golu ne´e, intensidade jogu kontinua manas liután. Nagardjo F.C no Fiel F.C kuaze iha materia jogadór ne’ebé ho kualidade hanesan, tanba ne’e, ekipa rua sempre lansa kontra atake ba malu ho ritmu jogu ida lais, maibé ekipa rua sei iha forsa hanesan, nune’e jogu to’o termina primeira parte  mantein ho score 1-0.

Tama ba segunda parte, ekipa Fiel F.C lansa kedas atake ba sira-nia adversáriu hodi buka oportunidade atu halo empata ba jogu ne’e ,no bele iha oportunidade atu manan jogu ne’e hodi hadaun billete promovidu ba primeira divizaun.

Iha  minitu 50 esforsu ne’ebé Fiel F.C iha konsege nakfilak ba realidade hodi marka golu ida liu husi jogadór Expedito Fuel hodi muda score ba 1-1.

Ho rezultadu ne´e ekipa Fiel F.C provizoriamente lidera tabela klasifikasaun grupu A ho pontu hitu no Nagardho F.C rekolla pontu rua husi jogu rua no tur iha terseira klasifikasaun.

Jornalista: Marito da Costa/Editór: Vito Salvadór