Justisa no Krime

Provadu Komete Krime Abuzu Seksuál Hasoru Menoridade, Welien Langa Kumpri Prizaun Tinan Hitu

todayNovember 11, 2026 21

Background
share close

Díli,  11 Novembru 2026 (RAFA)- Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) ezekuta mandadu detensaun husi Tribunál Judisiál Primeira Instánsia Díli (TJPID) hasoru kondenadu Welien Langa hodi  lori ba kumpri prizaun tinan-hitu tanba provadu komete krime abuzu seksuál hasoru menoridade.

DSIK ezekuta mandadu detensaun ne’e ba kondenadu Welien Langa ho idade 46, iha nia rezidensia hale’u tuku 09:12 Otl, iha Aldeia Delta 01, Suku Comoro, Postu-Administrativu Dom Aleixo Munisípiu Díli, Kuarta-ne’e.

Kazu ne’ebé kondenadu envolve mak krime abuzu seksuál hasoru menoridade ne’ebé akontese iha tinan 2022, hanesan define no punidu iha artigu 177°  númeru 2, no artigu 182 no alinea 1 husi Kódigu Penál Timor-Leste.

Tuir artigu 177°, abuzu seksuál ba menór iha númeru 2 hateten, se maka prátika aktu seksuál relevante ho labarik ne’ebé seidauk iha tinan 14 sei hetan pena prizaun tinan-lima  to’o tinan-15.

Iha fali artigu 182° agravasaun, alinea 1 hateten katak pena sira-ne’ebé prevé hela iha kapitulu ida-ne’e nia seksaun II too seksaun IV sei agrava datoluk ida iha nia limite mínimu no másimu.

Observasun RAFA iha edifisiu DSIK Komandu Jerál PNTL iha Díli, hale’u tuku 09:37 Otl, autoridade seguransa lori kondenadu Welien Langa  to’o edifisiu ho alzelma iha liman  no lori ba halo sertifikasaun hotu, kontinua kedas lori transporta kondendu ba iha Prizaun Becora hodi kumpri pena ne´ebé iha.

Jornalista: Juvinal Cabral dos Santos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!