Prova La Sufisiente, Tribunál Liberta Sidadaun Australianu husi Krime Tráfiku Droga

Sidadaun Australiano ne'ebé hetan akuzasaun ba krime tráfiku droga maibé laiha prova sufisiente.

Díli, 19 Setembru 2026 (RAFA)- Tribunál Judisiál Primeira Instánsia Díli (TJPID), liu husi Julgamentu Primeiru Interogátoriu, Sabádu-ne’e, deside liberta sidadaun Australianu ne’ebé akuzadu ba krime tráfiku ilísitu droga tanba  laiha prova sufisiente hodi akuza arguidu.

Kazu droga ne’ebé suspeita sidadaun Australianu bá krime tráfiku ilísitu droga, hamosu  dúvida  no dezentendimenentu entre autoridade Judisiál sira iha  prosesu audénsia Julgamentu Primeiru Interogátoriu.

Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK), Kinta 17 fulan-Setembru ne’e, ezekuta mandadu Tribunál hodi halo buska, apreensaun no kapturasaun  ba arguidu  iha Munisípiu Aileu.

Bainhira  tama iha  audénsia Julgamentu  Primeiru Interogátoriu  Juíza Ana Paula Fonseca halo identifikasaun bá arguidu  konsidera evidénsia sira ne’ebé Ministériu Públiku (MP) aprezenta iha autos seidauk sufisiénte atu sustenta prosesu, nune’e Tribunál haruka MP atu foti evidénsia sira.

Hafoin   rona tiha  leitura  Tribunál nian ne’e, Juíza Ana Paula Fonseca, ne’ebé dirije prosesu, haré katak evidénsia ne’ebé Ministériu Públiku aprezenta iha autos presiza hetan verifikasaun no kompleta ho objetu sira ne’ebé autoridade investigasaun halo apreensaun.

Tribunál  suspende  minutu 30 hodi fó tempu  bá Ministériu Públiku foti fali objetu sira ne’ebé  iha mak hanesan karreta, laptop, komputador, aparellu Starlink no ai-moruk balun ne’ebé deskonfia iha relasaun ho  droga. Hafoin Ministériu Públika lori objetu sira bá tribunál, no kontinua Audénsia.

Tuir observasaun RAFA  iha TJPID hatudu katak durante audénsia julgamentu, evidénsia ne’ebé aprezenta hosi autoridade investigador kona-bá alegasaun krime tráfiku ilísitu droga  bá arguidu  refere,  Juíza Ana Paula konsidera seidauk sufisiente atu sustenta akuzasaun.

Bainhira  atu kontinua julgamentu, derrepente juíz seluk  telefoni kedas bá Juíza Ana Paula  Fonseca atu substitui emidiatamente no informasaun ne’ebé iha katak,  hamosu dezendentimentu entre Tribunál no Ministériu Públiku ho Advogadu ne’ebé fó asistensia legál bá arguidu.

Informasaun seluk  mós  dekonfia suposta intervensaun husi emboot balun  bá juíza ne’ebé prezide prosesu ne’e, maibé  Juíza  Ana Paula Fonseca, insiste atu hala’o prosesu tuir evidénsia ne’ebé aprezenta iha tribunál no tuir regra no prosedimentu judisiál ninian.

Ho komplikasaun hirak ne’e, Juíza Ana Paula Fonseca deside suspende audénsia ne’e kuaze oras rua nia laran hodi hein ikomplikasaun.

Durante prosesu julgamentu ne’e, arguidu deklara bá Tribunál katak, ai-moruk   ne’ebé iha, la’ós droga,  maibé arguidu sofre  moras kompllikadu , tanba ne’e, presiza ai-moruk atu hemu bebeik.

Arguidu mós  konfensa bá Tribunál katak, Laptop no komputador, ho aparellu Starlink ne’e, nia uza hodi halao servisu peskiza ninian.

Minitériu públiku reprezenta husi Prokuradór Matias Soares promove  arguidu ho Krime  trafiku Ilísitiu droga. Maske nune’e  Minitériu Públiku dúvida ho Karta Mandadu  denetensaun  buska domisiliaríu  no apreensaun husi Tribunál ninian.

Tanba ne’e Minitériu Públiku mós konsidera  tribunál liu-liu  Juíza prosesu refere laiha  reponsabilidade kazu  ne’e,  nune’e mós husu tribunál atu la bele  lori problema interna tribunál ninian bá  iha prosesu refere.

Enkuantu Advogadu privadu Olivio Barros Afonso ne’ebé fo asisténsia legál bá arguidu ne’e,  konsidera  akuzaun ne’e  provas la sufiente.

Rona tiha parte hotu-hotu, tribunál  liu-husi Juíza Ana Paula deside liberta arguidu husi  krime trafiku ilísitu droga tanba  konsidera  provas la sufisiente.

Hafoin julgamentu arguidu refere asina kedas karta  libertasaun husi Tribunál ninian.

Jornalista: Marcelino Tomae/ Juvinal Cabral dos Santos