PNTL Hahú Prepara Planu Seguransa Ba Loron Finadu iha Munisípiu Hotu

Polísia Nasionál Timor-Leste.

Díli, 22 Outubru 2026 (RAFA)- Komandante Komandu Operasaun Nasionál Polísia Nasionál Timor-Leste (PNTL), Komisáriu Asistente Polísia Armando Monteiro hateten, Komandu Jerál iha planu preparasaun atu distribui membru sira ba Komandu Munisípiu sira hodi halo seguransa ba komunidade iha loron finadu, 02 Novembru 2026.

“Ita nia planeamentu preparadu hein de’it implementa, munisípiu balun ne’ebé mak ita konsidera potensialidade ba risku konflitu, ita sei apoiu bele asegura ita nia movimentu komunidade iha loron finadu, tantu kapitál ba munisípiu ida-idak,”  hatete Komisáriu Asistente Polísia Armando Monteiro ba jornalista sira iha Díli, Kinta-ne’e.

Komandu operasaun identifika mós fatin risku ba konflitu, tanba tempu loron finadu ema hotu-hotu akumula hamutuk iha foho, nune’e média sira kontribui informasaun  ba seguransa, no kualker ema ruma halo problema Polísia nia atuasaun bazeia ba Lei.

“Hanesan autoridade seguransa ita sei impoin ba Lei, sé de’it mak viola ita nia Lei sei atua tuir Lei no  tuir kompeténsia ne’ebé mak iha,” tenik nia.

PNTL husu komunidade hotu kontribui ba  seguransa durante loron finadu, evita konflitu no respeita malu iha loron importante ne’e.

Jornalista:  Juvinal Cabral dos Santos