Austrália iha Kompromisu Apoiu Timor-Leste Kombate Krime Transnasionál

Vise-Primeiru-Ministru no Ministru Defeza Austrália, Richard Marles hasoru malu ho PR José Ramos-Horta iha Palásiu Prezidensiál, Kinta 22 Outubru 2026.

Díli, 22 Outubru 2026 (RAFA)- Governu Austrália reafirma sira-nia kompromisu atu hametin kooperasaun ho Timor-Leste hodi kombate krime transnasionál, liu husi dezenvolvimentu kapasidade polísia no forsa defeza, partilla informasaun intelijénsia no hametin koordenasaun entre instituisaun seguransa husi nasaun rua.

Vise-Primeiru-Ministru no Ministru Defeza Austrália, Richard Marles, iha Palasiu Prezidensiál, Kinta-ne´e hatete, krime transnasionál sai dezafiu boot ba Timor-Leste, rejiaun Sudeste Aziátiku no Pasífiku. Tanba ne’e, kooperasaun entre nasaun sira importante tebes atu responde ba ameasa ne’e ho efetivu.

“Ami haree krime transnasionál nu’udar dezafiu boot ida ne’ebé Timor-Leste hasoru. Maibé, la’ós Timor-Leste de’it, tanba krime ne’e mós sai dezafiu ba rejiaun Sudeste Aziátiku no rejiaun Pasífiku,” Vise-Primeiru-Ministru no Ministru Defeza Austrália, Richard Marles hateten

Richard Marles hatutan, importante tebes atu dezenvolve kapasidade Polísia no Forsa Defeza, hodi sira bele kombate krime transnasionál ho efetivu. Maibé, presiza mós fahe informasaun intelijénsia, halo koordenasaun no hametin relasaun entre instituisaun sira.

Austrália hakarak asegura katak kooperasaun entre forsa polísia no forsa defeza husi nasaun rua bele atinji nivel ne’ebé di’ak liu. Atu bele halo buat hotu ne’ebé posível hodi enfrenta krime transnasionál.

“Ami haree katak krime transnasionál sai dezafiu ne’ebé aumenta iha rejiaun sira ne’ebé ami hela, inklui iha área ne’e. Ida-ne’e mak dezafiu komún ida ne’ebé ami tenke servisu hamutuk atu rezolve,” nia hateten.

Kompromisu Austrália nian ne´e, hahú implementa liu husi asina kuadru kooperasaun defeza no apoiu PNTL, ne’ebé hanesan akordu istóriku ida entre nasaun rua. No akordu ne’e loke dalan foun ba forsa defeza husi nasaun rua atu bele servisu hamutuk no hametin relasaun sira.

Jornalista: Cristina Ximenes