PM Xanana Akompaña PCIC Buska iha City-8 no Deklara Zero Toleránsia Ba Atividade Ilísita Scam Call Centre

PM Xanana haré direta suspeitu sira ne'ebé PCIC detein iha City-8 tanba deskonfia envolve iha atividade scam call centre, Sesta-kalan, 17 Jullu 2026.

Díli,  17 Jullu 2026 (RAFA.TL)- Primeiru-Ministru (PM), Kay Rala Xanana Gusmão, Sesta kalan-ne’e akompaña direta operasaun Polísia Seintifiku Investigasaun Kriminál (PCIC, sigla portugés) hodi desmantela no halo detensaun ba Xinés na’in-24 iha Otél City-8, Díli.

Iha biban ne’e, PM Xanana Gusmão  afirma no deklara tan katak  zero toleránsia ba prátika atividade ilísita iha Timor-Leste.

Prezensa PM Xanana  nian ne’ebé akopaña hosi diretór nasionál PCIC, Vicente Fernandes e Brito, diretór Servisu Nasionál Intelijénsia (SNI) Longuinhos Monteiro no ekipa Investigasaun PNTL nu’udá esforsu seiru no koletiva husi esntidade estadu no Governu  hodi kombate atividade ilísitu sira iha Timor-Leste.

“Problema ne’ebé estraga mundu, problema ne’ebé fasilita osan falsu no buat oioin de’it, fase osan, burla informátika  buat oioin de’it. Atividade jogu online ne’e bele óos estraga joven sira nia moris, liu-liu ba sira ne’ebé maka hakarak hetan osan ho maneira ne’ebé fasil liu,” Xanana Gusmão hateten.

Primeiru Ministru haktuir, komunidade fó arenda uma ne’e la’ós problema komunidade nian, ida ne’e otél City-8 mós bele akontese,  tanba ne’e mak  fó hatene ba joven sira no komunidade sira liu-liu Xina sira mak bá aluga hodi fó osan barak-barak di’ak liu aviza tiha ba polísia, lae hetan mós responsabilidade.

Xanana afirma tan kazu Scam Call Centre ne’ebé númeru aumenta, tenkeser haruka sira fila, tanba agora daudaun iha Konsellu Ministru sei haré no fó aviza ba embaixada sira, haré ho ezemplu sira rai ASEAN ninia balun.

“Konsellu Ministru mai ne’e ami atu halo buat ida, atu liu-liu alerta bá imigrasaun, investigasaun autoridade PNTL,  hodi haré didi’ak buat sira-ne’e hotu, tanba kazu ne’e la’ós halimar nian, kazu ne’ebé ita buka hadi’a ita nia rain mais kazu sira hanesan bele hatun Timor-Leste nia naran iha mundu, halo ema sira la fiar tan ona Timor. Toleránsia zero ba jogu sira scam call centre,  cybercrime no burla informátika,” Xefe Governu afirma.

Primeiru Ministru mós kontinua husu ba Media sira atu fó sai informasaun ne’ebé maka lolos no ajuda autoridade seguransa sira ne’ebé halo atividade buska no apreensaun.

Alem de buska no apreensaun ba sidadaun estranjeiru na’in-24 iha City-8 Manleuana, Autoridade seguransa sira mós hao buska ba sidadaun estranjeiru na’in-18 iha Kuluhun California, no lori kedas ba iha edifísiu PCIC hodi halo investigasaun no detensaun.

Jornalista: João Carlos/Editór: Vito Salvadór