PGR Avoka Prosesu Inkéritu sira iha CAC, Xanana Afirma Governu Sei Halo Reforma Ba Setór Justisa

Primeiru-Ministru Kay Rala Xanana Gusmão.

Díli, 16 Abril 2026 (RAFA.tl)- Primeiru-Ministru Kay Rala Xanana Gusmão,  afirma  Governu sei halo reforma ba setór justisa.

Notísia Relevante: JSMP Husu PGR Labele Arogánsia no Sakrifika CAC iha Luta Kombate Korupsaun

Primeiru-Ministru Kay Rala Xanana Gusmão hato’o deklarasaun ne’e hodi responde jornalista sira relasiona ho dezentedimentu instituisionál entre Prokuradoria Jerál Repúblika (PGR, sigla portugés), ho Komisaun Anti-korrupsaun (CAC), iha ne’ebé Prokurador Jerál Repúblika, Nelson de Carvalho hasai despaixu husu ba Prokuradór Repúblika hotu-hotu atu imediatamente  iha prazu másimu loron-lima (5), avoka (foti fila-fali) prosesu inkéritu hotu ne’ebé uluk delega ba Komisaun Anti Korrupsaun (CAC).

“Tanba ne’e mak sei halo reforma ba setór justisa tanba ida ne’e mak baze mós, problema rai ida boot tebes mós mak ema ida, 1999 moris iha Kupang ne’ebá mate iha 2008 família atu reklama nia hasai kartaun eleitorál iha 2014 no Tribunál simu dehan los, nia mate iha 2008 nia nunka mai vota iha ne’e nia kartaun eleitorál mosu iha 2014 tanba buat sira ne’e hotu,” Primeiru-Ministru Kay Rala Xanana Gusmão hateten Kinta (16/04/2026).

Xefe Governu hatutan, kazu iha Tribunál barak los mosu iha IV no V Governu konstituisionál, maibé agora kaer Governu ne’ebé hasai problema sira ne’e, maibé problema uluk kedas la’ós foin akontese.

“Ne’e hotu uluk kedas taka matan kazu ne’ebé pendente iha Tribunál barak los atu mosu karik iha IV no V Governu nian, tanba agora kaer Governu ne’ebé ema dudu dehan hasai ita nia problema agora la’ós agora, maibé problema kleur ne’ebé ha’u hanesan rona agora ne’e ha’u labele dehan ida ne’e mak razaun,” Xanana hateten.

Atu fó hanoin fila-fali katak, Prokuradór Jerál Repúblika (PGR, sigla portugés), Nelson de Carvalho, iha loron 03 Fevereiru 2026, hatún despaixu ho númeru 16/PGR/2026 hodi foti fila-fali ka avokasaun ba prosesu inkéritu hotu ne’ebé delega ba Komisaun Anti Korrupsaun (CAC).

Iha dokumentu despaixu PGR Nelson de Carvalho nian ne’ebé Rafa.tl asesa hatudu katak desizaun hodi hatún despaixu ne’e tuir dispozisaun iha artigu 132.°, n.º 2 Konstituisaun Repúblika Demokrátika Timor-Leste, no ho fundamentu iha dispozisaun kombinadu husi artigu 240 no 270, n.º 1, alínea a) no n.º 2, alínea b), husi Estatutu Ministériu Públiku hodi determina avokasaun (foti fila-fali) prosesu inkéritu.

Iha despaixu ne’e, Prokuradór Repúblika hotu-hotu hetan orden imediatamente atu iha prazu másimu loron-lima (5), avoka (foti fila-fali) prosesu inkéritu hotu ne’ebé uluk delega ba Komisaun Anti Korrupsaun (CAC).

 Jornalista: Elio dos Santos/Editór: Vito Salvadór