PCIC Halo Kontinuasaun Buska Bá Dirijente Timor GAP ho Inisiál AC

Prezidente Timor GAP, E.P, Rui Maria Alves Soares, foti-liman la admite jornalista sira atu foti imajen no foto ba atividade buska iha edifisiu Timor GAp,E.P, Kuarta (29/04/2026).

Díli, 28 Abril 2026, (Rafa.tl)- Polísia Sientífika Investigasaun Kriminál (PCIC, sigla portugés), Kuarta (29/04/2026),  haleu tuku 09:00 dadeer OTL,  halo kontinuasaun operasaun buska bá dirijente ida iha Timor Gas no Petróleu, Empresa Públika (Timor GAP, E.P), ho inisiál AC, iha edifísiu Timor Gap iha Timor Plaza, andár-tolu.

Notísia Relevante: Breaking News: CAC Halo Buska no Apreensaun Ba Jerente Timor GAP, E.P ho Inisiál AC

Observasaun Rafa.tl  iha asaun buska  parte ekipa PCIC to’o iha edifisiu empreza estatál Timor GAP, E.P hodi tama kedas bá  dirijente ho  inisiál AC nia gabinete hodi hala’o prosesu buska no investigasaun.

Iha tempu hanesan, jornalista sira husi média oioin hein iha área pesoal servisu resepsionista  nian hodi hein atu halo kobertura no halo gravasaun vídeo no foti imajen ba atividade buska no apreensaun ne’e, maibé Prezidente Konsellu Administrasaun Timor GAP, Rui Maria Alves Soares, husu jornalista sira ne’ebé atu halo kobertura bá atividade buska ne’e, atu husik hela fatin, ho razaun atu fó espasu bá servisu interna.

“Sé maka komvida imi mai? Di’ak liu imi sai husi ne’e, hodi fó espasu ba ami atu hala’o servisu,” Prezidente Timor GAP, E.P, Rui Maria Alves Soares, lia-tun ba jornalista sira no taka mós odamatan jornalista sira.

Molok ne’e, iha Kuarta, 17 fulan-Dezembru  tinan 2025, hale’u tuku 07:00 Otl, Komisaun Anti-Korrupsaun (CAC, sigla portugés) halo  ona buska no apreensaun ba jerente Timor GAP, E.P  ho inisiál AC iha nia rezidénsia privadu iha Suku  Comoro, Postu Administrativu Dom Aleixo, Munisípiu Díli.

Órgaun Polisiál CAC halo buska no apreensaun ba jerente  Timor GAP, E.P ho inisiál AC ne’e ho baze mandadu husi Ministériu Públiku tanba deskonfia komete krime abuzu  podér no partisipasaun ekonómiku.

Iha buska no apreesaun iha rezidénsia  AC nian ne’ebé lao durante oras rua ne’e, ekipa CAC rekolla evidénsia sira hanesan dokumentu sira no tau iha kaixa rua no asegura ho karreta privadu ida.

Hafoin rekolla evidénsia sira, ekipa CAC transporta kedas jerente inisiál AC ho evidénsia sira ba iha edifísiu CAC iha Farol iha tuku 09:30 Otl hodi halo prosesu identifikasaun no investigasaun.

Bainhira to’o iha edifísiu CAC, ekipa investigadór CAC nian direitamente  lori jerente  Timor GAP, E.P ne’e ba iha sala investigasaun nian hodi halo inkeritu no identifikasaun ba dokumentu no evidénsia sira ne’ebé rekolla iha terrenu.

Tuir informasaun ne’ebé Rafa.tl asesa husi fontes sira katak  atuasaun kontinua buska ne’e deskonfia iha relasaun ho kazu  projetu irrigasaun iha Munisípiu Aileu no mega projetu balun iha tasi-mane ka Suai, ne’ebé tuir relatóriu balun CAC nian katak kazu hirak ne’e iha ona prosesu investigasaun no iha ona prosesu konstrui sira ba prosesu kazu korrupsaun ho  investigasaun  artinje ona 60%.

Jornalista: João Carlos/Editór: Vito Salvadór