PCIC Detein Sidadaun Xinés Ida iha Díli Ne’ebé INTERPOL Buka Tanba Alegasaun Fraude Dolar Millaun Ida

PCIC kaptura sidadaun Xinés ida ne'ebé INTERPOL buka, Segunda 20 Jullu 2026. Imajen/Espesiál

Díli, 21 jullu 2026 (RAFA.TL) – Polísia Sientífika Investigasaun Kriminál (PCIC), Segunda, foin lalais ne´e, iha Aeroportu Internasionál Prezidente Nicolau Lobato,  kaptura sidadaun Xinés ida ne’ebé  Organizasaun Polísia Kriminál Internasionál  (INTERPOL, sigla inglés) buka, tanba alegadamente halo parte iha grupu fraude telefónika ne’ebé komete fraude ba vítima sira ho osan liu millaun ida.

Detidu identifikadu ho naran ZHANG Xiuquan, ho tinan 27, sujeitu hosi “red notice” ida ne’ebé fó sai hosi INTERPOL tanba pedidu hosi autoridade Repúblika Populár Xina nian.

Operasaun ne’e hala’o husi PCIC ho koordenasaun besik ho Servisu Imigrasaun.

Tuir notifikasaun INTERPOL nian, autoridade Xineza sira identifika no buka ZHANG Xiuquan, tanba krime fraude, iha kazu ne’ebé kaer hosi Sub-Eskritóriu Bincheng hosi Gabinete Seguransa Públika hosi Binzhou, iha provínsia Shandong.

Tuir faktu husi kazu sira, suspeitu alegadamente pertense, entre Fevereiru 2024 no Marsu 2026, ba grupu kriminozu ida ne’ebé lidera hosi JI Ping, ne’ebé sei livre hela, dedika ba fraude telefóniku no telemátiku.

Eskema ne’e envolve kriasaun hosi plataforma investimentu fraudulentu, hodi atrai vítima sira liuhosi rede sosiál xineza Douyin.

Uza promesa kona-ba taxa juru ne’ebé aas, membru grupu sira induz vítima sira atu instala aplikasaun investimentu ne’ebé manipuladu, liuhosi lukru ne´ebé sira hetan simulasaun hodi konvense sira atu investe osan ne’ebé boot liután.

Iha faze tuirmai, dadus plataforma nian hetan alterasaun hodi trava levantamentu sira, hodi prevene vítima sira atu rekupera sira nia osan ne’ebé investe ona.

Tuir investigasaun xinés nian, pelumenus vítima na’in lima, inklui ida ne’ebé identifika hanesan Han Qingjin, hetan fraude liu yuan millaun 7,16, ekivale ba dolar amerikanu millaun ida resin.

Iha grupu laran, ZHANG Xiuquan alegadamente atua hanesan intermediáriu, responsavel hodi konvense vítima sira atu investe iha plataforma.

Suspeitu ne’e tuir informasaun sai hosi Xina iha loron 15 fulan-Fevereiru tinan 2025, sa’e aviaun ida iha Shenzhen hodi ba Tailándia.

Mandadu kapturasaun hasoru ZHANG hetan aprovasaun iha loron 13 fulan-Marsu tinan 2026, hosi Prokuradoria Populár Bincheng, bazeia ba Artigu 266 hosi Lei Penál Repúblika Populár Xina nian, krime ida ne’ebé hetan kastigu másimu, prizaun perpétua lahó preskrisaun.

Arkivu Interpol nian mós indika risku voo nian ba alvu no sujere Kamboja, Tailándia, no Myanmar hanesan nasaun sira iha rejiaun ne’ebé nia bele buka refújiu.

Hafoin hetan detensaun, ZHANG Xiuquan transfere ba iha sela sira PCIC nian (Polísia Sentrál Investigasaun Kriminál), hodi hein prosesu estradisaun ne’ebé sei hala’o tuir lei Timor-Leste nian no tratadu bilaterál no multilaterál sira ne’ebé aplikavel.

Ida-ne’e hanesan kapturasaun daruak ba sidadaun estranjeiru ne’ebé INTERPOL buka ne’ebé maka rejista hosi PCIC, iha de’it loron balun nia laran.

Iha loron 19 fulan-Jullu, PCIC detein mós sidadaun xinés ida seluk iha aeroportu, sai mós hanesan alvu hosi “red notice”ida tuir pedidu hosi Pekin, iha kazu ne’e iha ligasaun ho kazu ida ne’ebé envolve organizasaun prostituisaun nian, ho mandadu kapturasaun ida ne’ebé fó sai iha fulan-Dezembru tinan 2024 hosi eskritóriu distritál Jiangbei nian iha Chongqing.

Suspeitu ida-ne’e hetan intersepsaun bainhira nia prepara atu husik hela país ne´e.

Reportajen Ekipa RAFA.TL