Opozisaun Levanta Problema Merenda Eskolár iha Lautem

Programa merenda eskolár. Imajen/dok.ME

Díli, 02 Juñu 2026 (RAFA.tl)- Membru Parlamentu Nasionál (PN) husi Bankada Opozisaun FRETILIN konfirma sira simu keixa barbarak husi Munisípiu Lautem relativa ho programa merenda eskolár.

Membru Bankada FRTETILIN, Maria Anabela Sávio, iha sesaun plenária PN iha ámbitu diskusaun Orsamentu Retifikativu 2026, Tersa (01/06/2026), aprezenta  preokupa programa merenda eskolar iha Munisipíu Lautem ne’ebé maiória eskola sira iha munisípiu refere enfrenta  problema.

“Atu ko’alia sobre merenda eskolár, ami simu keixa bara-barak liuliu husi Munisípiu Lautem, iha eskola Ensinu Báziku Filial (EBF) Kuluhun, iha fotografia iha ne’e sira han de’it ho fehuk tanan de’it baluk rua  iha bikan laran,” Deputada  Maria Anabela Sávio  hateten hodi aprzenta fotografia kona-bá merenda eskolár iha EBF Kuluhun, Lautem.

Nia mós aprezenta situasaun merenda eskolár iha Ensinu Báziku Central (EBC) Sentru Lospalos nian ho situasaun hanesan, menu merenda eskolár la tuir no la refleta merenda eskolár ho hahan nutritivu. Tanba ne’e, husu  Prezidente Autoridade Munisípiu  (PAM) haré didi’ak.

Reprezentante povu ne’e afirma,  keixa problema merenda eskolár ne’e mai husi inan-aman estudante nian, la’ós Deputada sira ko’alia arbiru de’it, maibé inan-aman estudante nian  manda fotografia no lori keixa mai hato’o depois sira públika iha sira nian mídia sosial Facebook.

Iha fatin hanesan Deputadu Bankada CNRT Gabriel Soares, esplika Deputadu sira balu dehan han fehuk baluk rua de’it, naan pedasuk de’it, presiza hatene sentidu merenda eskolár, katak atu tahan de’it estudante ira nian estomagu.

“Programa ne’e la’o kleur ona, ita nian inan-feton sira tein ne’e tetu, fos ne’e grama hira, modo tahan sira ne’e grama hira, la’ós han para atu bosu, atu tahan estomagu para  ita nian oan sira oinsá akompaña prosesu aprendisazen,” Deputadu Gabriel Soares hateten.

Hatán ba preokupasaun ne´ebé iha, Prezidente Autoridade Munisipíu (PAM) Lautem, Mélio de Jesus, rekoñse  iha EBF Kuluhun akontese duni hanesan saida mak Deputada Maria Anabela Sávio kestiona hodi aprezenta ho fotografia ho video.

“Loos duni akontese duni, informasaun ne’ebé ha’u rekolla antes ha’u forma investigasaun, tanba ita ko’alia kona-bá merenda eskolár, iha ekipa jestaun programa ne’e iha nivél eskola. Ba eskola EBF iha kuluhun no Lautem, ekipa jestaun programa fornese ai-han no menu ne’ebé mak fornese hahan ba ita nian alunu sira, maibé tuir informasaun ne’ebé ha’u rekolla seidauk ba investigasaun.  Sasan sira ne’e ba semana rua sira la tein hodi prezudika hanesan fotografia sira ne’ebé mak ohin Deputada aprezenta,” PAM Mélio de Jesus  hateten.

Autoridade Munisípiu Lautem forma ona  ekipa investigasaun ne’ebé kompostru husi  xefia sekretáriu asuntu sosial komunitaria, direóor fiskalizasaun, diretór saúde, diretór finansa, diretór edukasaun no diretór alimentár seguransa halo investigasaun kle’an.

“Karik informasaun ne’ebé mak loos, mak medida ne’ebé administrasaun foti mak ne’e, hasai diretór eskola ka koordenadór eskola ne’ebé mak implementa jestaun  programa referé,” Melu de Jesus afirma.

PAM Lautem esplika kona-bá menu merenda eskolár ne’e mak la to’o duni, PAM iha  programa ida servisu hamutuk ho Ministériu Agrikultura, kada suku PAM implementa programa ida naran demoplot atu halo vida agrikola hodi sustenta hahan ba eskolár sira purvolta  US$700 ba kada suku hodi kuda modo para menu ba merenda eskolár.

 Jornalista: Zita Menezes/Editór: Vito Salvadór