MP Promove Arguidu Na’in-Neen Utiliza Veíkulu Estadu iha Loron Feriadu ho Krime Pekulatu ba Uzu

CAC lori arguidu sira ba partisipa julgamentu sumariu iha TJPID, Kuarta 26 Agostu 2026.

Díli, 26 Agostu 2026 (RAFA) – Tribunál Judisiál Primeira Instánsia Díli (TJPID), Kuarta-ne’e, halo julgamentu sumariu bá  arguidu na’in-neen, Funsionáriu Públiku, ne’ebé utiliza veíkulu estadu iha loron feriadu.

Notísia Relevante: Utiliza Veíkulu Estadu iha Loron Feriadu, Funsionariu Públiku Na’in-Neen Detein iha Sela CAC

Durante julgamentu sumariu  ne’e, Tribunál liuhosi Juís José Escurial, lee akuzasaun Ministériu Públiku (MP) ne’ebé imputa ba arguidu na’in-neen mak Pekulatu ba Uzu,  ne’ebé previstu no punidu tuir Artigu 83.º Lei N.º 7/2020, 26 Agostu, kona-bá Medida Prevensaun Kombate  Korrupsaun.

Arguidu na’in-neen ne’e hetan detensaun iha sela Komisaun Anti-Korrupsaun (CAC) hafoin operasaun no fiskalizasaun ekipa konjunta nian iha loron 23 fulan-Agostu 2026, iha área Kasnafar, Díli.

CAC hamutuk ho Diresaun Nasionál Transporte no Terrestre (DNTT), Diresaun Jerál Patrimóniu Estadu ho Polísia Undidade Tránzitu hala’o operasaun fiskalizasaun deteta arguidu sira uza veíkulu Estadu  ne’ebé la’ós iha loron servisu no la aprezenta guia de marxa husi superior sira kona-bá utilizasaun patrimoniu Estadu iha loron feriadu.

Arguidu sira utiliza patrimoniu Estadu ba interese pesoál, hanesan motorizada Honda Verza  ho numéru matríkula 7151-G, motór Honda Verza matríkula 5239-G,  motór Yamaha XTZ 150 matríkula 4536-G, motór Honda Supra X-125  ho matríkula 7826-G,  karreta  Ford Ranger matríkula 04-852-G, no Karreta Toyota Hilux ho matríkula 03-318-G.

MP konsidera katak arguidu sira utiliza viatura no motorizada sira uza iha liur husi ámbitu funsaun públika no ba finalidade pesoál ka finalidade seluk ne’ebé la’ós servisu Estadu.

Arguidu na’in-neen ne’e detidu iha flagrante delito iha loron 23  fulan-Agostu 2026, iha momentu fiskalizasaun, bainhira sira uza viatura Estadu ne’e.

Hafoin Tribunál  halo letura bá  akuzasaun Ministériu Públiku, arguidu sira  deklara bá Tribunál katak, akuzasaun  ne’ebé Minitériu públiku produz loos hotu. Arguidu sira maioria utiliza viatura Estadu hodi hala’o atividade família ne’ebé laiha  autorizaun husi sira nia  superior.

Ministériu Públiku reprezenta husi Prokuradór João Marques solita bá Tribunál  atu dekreta akuzasaun ne’e, hodi aplika tuir sirkunstansia ne’ebé  hatudu iha  autos.

Defensór Públiku Manuel Amaral, husu Tribunál tetu  hodi aplika tuir sirkunstansia ne’ebé previstu ona iha kódigu penál.

Rona tiha, alegasaun Ministériu Públiku ho Defensór Públiku, Juís prosesu José Escurial, halo  valida bá objetu  hodi entrega viatura Estadu bá institusaun ida-idak nian,  no valida liberta arguidu sira, hodi  hein despaisu Tribunál.

Juís José Escurial deside atu fó sai desizaun bá  krime pekulatu ba uzu ne’e iha segunda, 31 fulan-Agostu 2026,  tuku 14:00 Otl.

Julgamentu sumariu ne’e prezide husi Juis José Escurial, Ministériu Públika reprezenta husi Prokuradór João Marques, arguidu na’in-neen (6) hetan asistensia legál husi  Defensór Públiku,  Manuel Amaral.

Jornalista: Marcelino Tomae