Ministru Agio Pereira Suspeita Ba Kazu Abuzu Poder no Administrasaun Danosa

Karta Ministériu Públiku nian ne'ebé solisita atu rekiza ba membru governu atu huus autorizasaun ba dilijensia Imajen/Dok.MP/Repro

Díli, 10 Abríl 2026 (RAFA.tl)- Ministériu Públiku (MP), liu husi karta ho Nu. Ref.225/GCCCCO/PGR/III/2026, solisita atu rekiza ba membru Governu, Ministru Prezidénsia Konsellu Ministru (MPCM), Hermenegildo Cabral Pereira (Agio Pereira) atu presta deklarasaun dilijensia tanba deskonfia halo abuzu poder no administrasaun danosa.

Abuzu poder no administrasaun danosa mak krime rua ne’ebé dala barak la’o hamutuk, maibé sira iha diferensa. Abuzu poder foku ba asaun ne’ebé komete husi funsionáriu públiku ida hodi uza ninia kargu ka autoridade ba objetivu seluk ne’ebé la’ós ba interese públiku. Katak individu Estadu nian uza ninia podér hodi halo buat ida ne’ebé lei la fó autorizasaun ka uza podér ne’ebé nia iha hodi fó benefísiu ba nia aan rasik ka ema seluk, ka hodi fó prejudika ba ema seluk.

Adminiatrasaun danosa foku ba rezultadu ka prejuizu finanseiru/patrimoniál ne’ebé mosu tanba jestaun ne’ebé ladi’ak ka iha intensaun aat. Signifika akontese bainhira ema ne’ebé iha knaar atu jere/administra osan ka sasán (Estadu ka privadu nian) foti desizaun ne’ebé lori  prejuizu ba instituisaun ne’e. Ne’e violasaun ba dever atu jere ho kuidadu no onestidade.

Iha karta ne’ebé Rafa.tl asesa, Sesta (10/04/2026),  ho NUC 0038/26.PGGCC no assina husi Prokuradór Matias Soares, haktuir, iha GSKKKO iha prosesu ida ne’ebé mak rejistadu nu’udar inkeritu ba krime Abuso de poder e Administracão danosa, P. e P. Art. 85 da lei N.7/2020 de 26 de Agosto e art 274 CP, kontra suspeitu Hermenegildo Cabral Pereira (Agio Pereira) Ministru Prezidensia konsellu Ministru (MPCM), lezadu Estadu RDTL, atualmente iha hela faze investigasaun.

Liuhusi karta Ministériu Públiku nian ne’e hakarak informa ba V.Excia. Prokurador Geral da Republica, Nelson de Carvalho, katak haktuir ba instrusaun serbisu numeru 03/PGR/2022, iha klauzula 1, hodi rekere ba V.Excia atu solisita ba membru Governu ho naran: Hermenegildo Cabral Pereira (Agio Pereira) atuál asume kargu nu’udar Ministru Prezidénsia Konsellu Ministru (MPCM), atu marka dilijensia iha loron-10/04/2026, tuku 14h30 to’o remata, iha Gabinete Kombate Korrupsaun (GCC, sigla portugés) kualidade hanesan suspeitu.

Iha karta ne’e sulisita  ba suspeitu atu lori mós ninia Advogadu ka Defensor Públiku atu asiste iha dilijensia interrogatóriu suspeitu, haktuir dispozisaun art. 68 CPP obrigatorioedade asisténsia.

Bazeia ba karta  prestasaun dilijensia ne’e,  iha Sesta, 10 Abríl 2026, jornalista Rafa.tl hein iha resintu Prokuradoria Jerál Repúblika (PGR, sigla portugés), Colmera, maibé nota  katak Ministru Prezidénsia Konsellu Ministru (MPCM) Agio Pereira ne’ebé alegadu nu’udar suspeitu la marka prezensa iha Ministériu Públiku.

Tuir fontes iha Ministériu Públiku informa katak suspeitu Agio Pereira halo deit deklarasaun eskrita (hakerek) hodi hatan ba akuzasaun ne’ebé Ministériu Públiku konstitui ba nia.

To’o notísia ne’e públika Rafa.tl seidauk halo konfirmasaun direita ho Ministru Prezidensia Konsellu Ministru (MPCM, sigla portugés), Hermenegildo Cabral Pereira (Agio Pereira) ne’ebé Ministériu Públiku suspeita ba kazu abuzu poder no administrasaun danosa.

Reportajen ekipa RAFA