MCAE La Trava Esbosu Lei Saláriu Mínimu Atu Lori Ba Konsellu Ministru

Koordenadór Jeral MCAE, Jorge Rui de Carvalho Martins.

Díli, 12 Outubru 2026 (RAFA) –Ministériu Koordenadór ba Asuntu Ekonómiku (MCAE, sigla portugés), nunka trava esbosu lei saláriu mínimu atu lori ba Konsellu Ministru, maibé hein hela konsiderasaun no desizaun polítika.

Koordenadór-Jerál MCAE,  Jorge Rui de Carvalho Martins, esplika prosesu tékniku kona-bá esbosu lei saláriu mínimu remata ona, maibé proposta ne’e seidauk avansa ba Konsellu Ministru tanba hein konsiderasaun no desizaun polítika.

Jorge Rui de Carvalho Martins ba jornalista sira iha Palásiu Governu,  Sgunda-ne’e, klarifika katak prosesu tékniku kona-ba proposta ne’e envolve ona instituisaun relevante sira hanesan Konsellu Nasionál do Traballu (CNT), Sekretaria Estadu Formasaun Profisionál no Empregu (SEFOPE) no Kámara Komérsiu no Indústria Timor-Leste (CCI-TL) hodi halo enkontru no finaliza dokumentu sira ne’ebé presiza.

‘’Bainhira maka  nia atu avansa ba Konsellu Ministru depende teb-tebes ba desizaun polítiku, la’ós tekniku ona. Entaun, tenke iha seriedade husi na’in ba projetu, atu buka tuir no ko’alia, ne’ebé problema ne’e laiha ida, simples hela, ita la komprende prosesu derepente ita akuza,”  Koodenadór Jerál MCAE ne’e  afirma.

Jorge Rui de Carvalho Martins hatutan  atu avansa proposta ne’e ba Konsellu Ministru, presiza iha koordenasaun no konkordánsia entre entidade governamentál sira ne’ebé envolve iha prosesu ne’e.

Tuir nia, MCAE finaliza ona nia análize téknika, inklui aspetu makro ekonómiku no mikro ekonómiku. Tanba ne’e, nia husu atu laiha konfuzaun kona-bá responsabilidade instituisaun sira iha prosesu preparasaun proposta saláriu mínimu.

Nia  mós subliña katak SEFOPE, nu’udar entidade ne’ebé iha responsabilidade ba projetu ne’e hamutuk ho Konsellu Nasionál Traballu, presiza kontinua halo akompañamentu atu prosesu bele avansa.

‘’Proposta ne’e tenke ba duni. Maibe, ne’e presiza seriedade polítiku sira, la’ós tekniku, ami halo ona mai kria ona ekipa de traballu, CNT mós iha laran, SEFOPE mós iha laran, CCI-TL mós iha laran, enkontru ida ne’e dala-rua, dokumentu finaliza ona, agora derepente deit dehan MCAE trava, ida-ne’e sai fila-fali konfuzaun foun,’’ Jorge Rui de Carvalho lamenta.

Proposta saláriu mínimu to’o US$160

Koordenadór Jerál MCAE hatete  iha diskusaun kona-bá proposta saláriu mínimu, presiza konsidera impaktu ba folin nesesidade bázika iha merkadu no kondisaun traballadór sira.

Nia esplika katak proposta ne’e envolve ajustamentu husi US$115 ba US$154, antes CNT propoin aumentu ba US$160.

Tanba ne’e, MCAE husu ba ministériu no entidade relevante sira atu armoniza sira-nia pozisaun kona-bá proposta US$160, atu nune’e, bele garante implementasaun ne’ebé efetivu no efikás.

Jorge Rui de Carvalho mós informa katak proposta esbosu lei saláriu mínimu ne’e la’ós foin hahú. Tanba, prosesu ne’e iha ona iha Konsellu Ministru.

Tuir nia, buat ne’ebé presiza agora mak konsiderasaun no desizaun polítika atu bele kontinua diskusaun no avansa proposta ne’e.

Nia mós relata kona-bá situasaun atual la’ós problema tékniku, maibé presiza iha komprensaun komún kona-bá prosedimentu no desizaun ne’ebé tenke foti hodi lori proposta ne’e ba oin.

‘’Kauza lolos hodi impede asuntu ida ne’e maka iha deit prosesu atu komprende, prosedimentu atu submete esbosu lei ne’e ba Konsellu Ministru, prosesu ne’e hein deit diskusaun polítiku ona, ne’e la’os iha prosedimentu tekniku,” tenik Jorge Rui de Carvalho.

MCAE husu ba parte hotu ne’ebé envolve iha prosesu ne’e atu kontinua diálogu ho respeitu, uza dadus no evidénsia iha diskusaun, no evita akuzasaun ne’ebé bele hamosu konfuzaun iha públiku.

Jornalista : Remigia Locatelli