KTON Reprezenta Timor-Leste Promove Kafé Espesiál iha HOTELEX Shanghai 2026

Kafe Timor Organiku e Natural (KTON) marka istória hodi sai empreza úniku husi Timor-Leste ne’ebé partisipa iha feira internasionál prestijiozu, HOTELEX Shanghai 2026. Imajen/Rafa.tl

SHANGHAI, RAFA.tl — Grupu Empreza Esperança Timor Oan (ETO) nia empreza subsidiáriu Kafe Timor Organiku e Natural (KTON) marka istória hodi sai empreza úniku husi Timor-Leste ne’ebé partisipa iha feira internasionál prestijiozu, HOTELEX Shanghai 2026, ne’ebé la’o husi loron 30 Marsu to’o loron 02 Abríl 2026.

Notísia Relevante : KTON Kualidade Espesiál no Sabor Orijinál Ne’ebé Diferente

Eventu ida ne’e rekoñese hanesan feira boot liu iha área ospitalidade, indústria bebidas no ai-han, ho espozitór prinsipál kuaze liu rihun 3,500, ho vizitante profisionál sira hamutuk rihun 300,000 resin.

Joanico Oliveira, reprezentante KTON iha Feira Internasionál iha Shanghai ne’e, konfirma katak eventu ida-ne’e mós sai ona hanesan enkontru global ida hodi konekta  ka sai ponte ba produtór, kompradór, kafesista sira globalmente.

 HOTELEX Shanghai organiza eventu ida-ne’e,  durante tinan 30 resin, no konsidera hanesan eventu prestijiu boot iha Asia no nivel global.

Reprezentate KTON,  Joanico Oliveira informa, prezensa KTON iha eventu ida-ne’e, sai hanesan oportunidade ne’ebé vitál atu promove originalidade kafé Timor ba mundu, no KTON sai hanesan empreza úniku hodi reprezenta Timor-Leste iha eventu ne’e.

Iha eventu ne’e, KTON aprezenta nia produtu kafé espesiál, ne’ebé mai ho ninia karakteristika uniku no poténsia Timor-Leste hanesan orijen ba kafé. La’ós de’it atu aprezenta maibé visitante sira mós hetan oportunidade atu partisipa iha sesaun cupping no demonstrasaun brewing, hodi esperensia no sente diretamente sabor kafé ne’ebé mak mai husi agrikultor.

KTON mós introdus nia abordagem foun iha prosesamentu kafé, ho inovasaun no teknolojia ne’ebé lori mudansa foun ba industria kafé. Inisiativa ida-ne’e refleta ambisaun atu lori Timor-Leste sai hanesan orijen kafé espesiál ne’ebé rekoñese iha mundu.

Iha sorin seluk,  iha mós atividade kompetisaun no programa industria hanesan World Barista Championship China Regional Selection, World Coffee Roasting Competition China Regional Selection, China Cup Tasters Championship, iha mós forum no showcase sira ne’ebé hatudu tendensia no inovasaun foun iha industria kafe global.

Dezeñu ba booth KTON nian, kombina elementu kultura Timor ho aprezentasaun modernu, ne’ebé refleta onda foun iha industria kafé Timor-Leste — foku ba kualidade, inovasaun no sustentabilidade, maibé nafatin respeita kultura lokal. Konseitu id- ne’e hatudu liuhusi padraun no kór ne’ebé inspira husi kultura Timor, no mós utilizasaun ekipamentu modernu atu prepara no serve kafé, hodi kria balansu entre tradisaun no praktika kafé modernu.

Iha loron dahuluk eventu, KTON simu vizitante besik to’o rihun ida ne’ebé hatudu interese boot husi audiénsia internasionál sira kona-bá orijen  kafé ne’ebé  ema barak seidauk esplora no konhese kafe Timor.

 Vizitante sira gosta tebes Kafe KTON tanba kualidade no esforsu ne’ebé KTON halo hodi garante kualidade no konsistensia iha sira nia produsaun tomak.

 KTON implementa sistema ida ne’ebé estruturadu hodi kontrola kualidade liu husi faze oin-oin, hahú husi selesaun ba kafé musan to’o produtu finál.

KTON mós kumpri ona padraun internasional ne’ebé mak hanesan Specialty Coffee Association (SCA)  protocol, rekoñesidu tebes iha mundu, iha sorin seluk, KTON mós iha ona sertifikadu Q Processing Professional husi Coffee Quality Institute (CQI) tan ne’e rezultadu husi prosesu tomak ba produtu KTON nian tuir ona padraun no kualidade internasionál

 Prezensa KTON iha HOTELEX Shanghai atu bele foti hikas Timor nia naran iha mundu internasionál ba kualidade kafé espesiál, tan ne’e, KTON hahú foku ona iha importasaun kafé espesiál, iha nebe’e, iha tinan 2025, KTON hanesan empresa uniku nebe’e exporta  kafé kualidade espesiál ho tonelada 11.80 ba Estadus Unidus Amérika.

 Exportasaun ida ne’e sai hanesan etapa importante, ne’ebé hatudu katak kafé Timor-Leste bele kumpri padraun internasional no kompete iha merkadu internasional, loke tan  oportunidade foun ida ba KTON hodi halo exportasaun kafé ba Xina

Iha tempu hanesan, KTON mós buka atu tama ba merkadu Xina, ne’ebé industria kafé nian kresimentu sae iha tinan hirak ikus ne’e.

 Tuir relatoriu industria, merkadu kafé iha Xina aumenta sa’e ba bebeik iha kada tinan, ho konsumu ne’ebé kontinua sa’e, jerasaun foun sira mós hahú tau ona interese ba kafé espesiálidade. Tendénsia ida-ne’e hatudu katak Xina sai hanesan merkadu potensial boot liu iha mundu, ne’ebé importante ba produsor kafe atu esplora oportunidade foun.

Joanico Oliveira fundamenta katak KTON partisipa iha eventu internasionál ida-ne’e, la’ós deit atu halo expansaun negósiu, maibé mós atu reprezenta poténsia industria kafé Timor-Leste.

Iha sorin seluk, representante KTON mós sublinha tan katak; “KTON nia Partisipasaun iha eventu ida ne’e hanesan oportunidade atu lori kafe Timor-Leste ba audiensiu global no hatudu katak ita-nia rai iha poténsia boot atu prodús kafe ho kualidade aas,”.

Liuhusi partisipasaun iha HOTELEX Shanghai 2026, KTON buka atu halo koneksaun ho distribuidor, roaster no parseria sira ne’ebé interesa atu sosa kafe husi Timor-Leste, iha sorin seluk mós atu hetan informasaun kona-bá tendénsia merkadu no dezenvolvimentu industria global.

Ba futuru, KTON planeia atu kontinua haluan nia prezensa internasional liuhusi parseria estratéjika no partisipasaun iha eventu global. Ho foku ba kualidade, inovasaun no sustentabilidade, KTON hakarak kontribui ba kresimentu tempu naruk industria kafé Timor-Leste no haforsa nia pozisaun hanesan origem kafe espesiálidade iha mundu.

Reportajen Ekipa Rafa.tl