Kriminaliza Difamasaun Atu Sosiedade iha Responsabilidade Ba Aktu Rasik

António Verdial, membru bankada KHUNTO hanesan proponente ba Lei Kriminaliza Difamasaun.

Díli, 09 Juñu 2026 (RAFA.TL)- Xefe Bankada KHUNTO, Deputadu António Verdial de Sousa, hatete Deputadu sira iha mandatu konstituisional atu goza imunidade no alterasaun ba lei kriminaliza difamasaun atu  sosiedade iha responsabilidade ba aktu rasik.

Notísia Relevante: Movimentu Direitus Umanus Sei Halo Manifestasaun Kontra PN Bainhira Aprova Lei Kriminaliza Difamasaun

Xefe Bankada KHUNTO António Verdial de Sousa, ba jornalista sira iha Parlamentu Nasionál, Tersa (09/06/2026) hatete, ko’alia kona-bá prespetiva lei imunidade mandatu ne’ebé Deputadu sira mai hala’o knaar iha Parlamentu Nasionál ne’e mandatu Konstituisionál klaru ida ne’ebé mai sai Deputadu  nia tenke iha uminidade.

“Laiha razaun atu kestiona, hotu-hotu bele kestiona, hotu-hotu iha direitu tanba dehan katak iha liberdade ko’alia tanba konstituisaun garante, maibé ha’u atu hatete katak mezmu konstituisaun garante ema bele ko’alia, maibé ko’alia ne’e tenke ho responsabilidade ne’e importante no kestaun imunidade nian,” Deputadu António Verdial de Sousa hateten.

Iha fatin hanesan, Deputadu Bankada CNRT no Prezidente Komisaun A ba asuntu konstituisionál no justisa Deputadu Natalino dos Santos hatete, imunidade ne’ebé halo protesaun membru orgaun soberania hanesan Deputadu, Membru Governu, eis-titulár sira, sei vale de’it bainhira sira kaer hela kargu, maibé sira sei  nafatin responsabiliza hodi hatán ba justisa bainhira kometé kazu krimé ruma.

Nia hatutan imunidade ne’e la’ós loro-loron Deputadu sira   iha imunidade ne’e kuandu iha plenária ka kaer hela kargu,  maibé kuandu  membru órgaun soberania balu halo krimé ruma ne’e idaidak tenke responsabiliza.

“Imunidade ne’e kuandu hala’o nian funsaun hanesan Deputadu, hanesan membru Governu, depois nia hotu nia mandatu nia bele ba hatán nia kazu, haré katak agora daudaun eis-Ministru eis-Deputadu sira balu ba hasoru hela tribunál,”hDeputadu Natalino dos Santos  informa.

Deputadu ne’e esplika bainhira Deputadu ida atu ba hatán nia kazu  iha prosedumentu tuir lei hatete tenke lori mai plenária, hodi bele hasai Deputadu ne’e nia uminidade nune’e  nia ba hanesan sidadaun no hasai nia kargu hodi bele  ba hatán iha  lei nia oin.

“Kritika ba sidadaun sira ne’e normal, ita hotu sidadaun, ha’u mós sidadaun, Deputadu no  Membru Governu sira ne’e sidadaun hotu, funsaun mak la hanesan imi  jornalista ami Deputadu maibé hotu-hotu iha lei nia okos hanesan de’it,”  tenik nia.

Deputadu bankada CNRT ne’e subliña iha artigu 18 Timoroan hotu hanesan iha perante justisa nian, laiha ema ida imunidade husi lei, ezemplu haré lider barak tribunál bolu sira ba kumpri ne’e hatudu katak sidadaun di’ak.

Nia informa daudaun ne’e komisaun A trata asuntu konstituisionál no justisa simu hela despaxu balu  mai iha komisaun atu hasai imunidade Deputadu na’in-tolu nian para depois bele ba  hatán iha Ministériu Públiku.

Jornalista : Zita Menezes/Editór: Vito Salvadór