Konsellu Majitratura Portugál Prontu Apoiu Instalasaun Supremu Tribunál Justisa Timor-Leste

PPN Maria Fernanda Lay hasoru malu ho Prezidente Repúblika, José Ramos-Horta iha Palásiu Prezidensiál, Segunda (27/04/2026).

Díli, 27 Abríl 2026, (Rafa.tl)- Prezidente Parlamentu Nasionál (PPN), Maria Fernanda Lay, informa Konsellu Majistratura Portugál prontu apoiu instalasaun Supremu Tribunál Justisa Timor-Leste.

Notísia Relevante: PPN Fernanda Lay husu Populasaun Poupa Enerjia no Hanenus Viajen Sira La Nesesáriu

Prezidente Parlamentu Nasionál (PPN), Maria Fernanda Lay hato’o deklarasaun ne’e ba jornalista sira iha Palásiu Prezidensiál, Segunda (27/04/2026), hafoin hasoru malu ho Prezidente Repúblika (PR), José Ramos-Horta, hodi informa kona-ba vizita traballu ne’ebé delegasaun Parlamentu Nasinoál hala’o ba Portugál, foin lalais ne’e.

“Ha’u hetan ho Prezidente Konsellu Superiór Majistratura ne’ebé sei ajuda Timor-Leste durante prosesu atu ita instala Supremu Tribunál Justisa tuir intensaun Prezidente Repúblika,” Maria Fernanda Lay hateten.

Nia hatutan Supremu Tribunál  Portugál nian atu fó apoiu iha selesaun juís  Timoroan sira, nune’e bele lidera  Supremu Tribunál Justisa. Tamba ne’e, kona-bá kandidatu no oinsá halo selesaun no rekizitu  hotu ekipa husi Portugál, liu-liu Konsellu Majitratura Portugál mak sei define no hatur tuir lei ne’ebé vigora.

Maria Fernanda Lay subliña katak, tuir rekizitu sei iha teste hala’o ba  juis timoroan sira. Bainhira harii Komisaun para nia  prosesu la’o hodi deside  kalendáriu selesaun ne’e.

Jornalista: João Carlos/Editór: Vito Salvadór