Konsellu Imprensa Atribui Sertifikadu Rejistu Ba RAFA ho NTV iha Ámbitu Komemorasaun Tinan-50 Trajédia Balibo

Jerente ETO TELCO, Edmundo Freitas Lopes simu sertifikadu rejistu órgaun komunikasaun sosiál RAFA ho NTV iha ámbitu selebrasaun tinan-50 trajédia Balibo no tinan-3 loron nasionál liberdade imprensa iha Postu Administrativu Balibo, Munisípiu Bobonaro, 16 Outubru 2025. Imajen/Rafa.tl

BOBONARO, RAFA.tl– Konsellu Imprensa Timor-Leste ofisialmente atribui sertifikadu rejistu órgaun komunikasaun sosiál ba RAFA no NTV iha ámbitu komemorasaun tinan-50 trajédia Balibo ka koñesidu hanesan Balibo Five no tinan-tolu loron Nasionál Liberdade Imprensa ne’ebé selebra iha Postu-Administrativu Balibo, Munisípiu Bobonaro.

Atribuisaun sertifikadu rejistu órgaun komunikasaun sosiál RAFA no NTV ne’ebé entrega husi Prezidente Konsellu Imprensa, António M. D. C. Moniz Mali ba Jerente ETO TELCO, Edmundo Freitas Lopes, nu’udár aktu lejitimu ne’ebé hatudu ba sosiedade Timorense, katak RAFA no NTV sai ona hanesan kanál orgaun komunikasuan sosiál ofisiál  ne’ebé sei transmite informasaun sira hodi hakonu sosiedade ne’e ho informasaun sira tuir lema no karakter RAFA no NTV nian.

Prezidente Konsellu Imprensa Timor-Leste, César Mali hateten média hotu-hotu tenke rejistu iha Konsellu Imprensa hanesan mandatu iha Lei Komunikasaun Sosiál artigu 28 kona-bá rejistu órgaun no meiu komunikasaun sosiál.

Nia esplika rekizitu baziku ba média sira atu hetan sertifikadu rejistu nian iha Konsellu Imprensa, maka tenke iha Estatutu Editoriál, tenke iha Jornalista, tenke iha redasaun, xefe redasaun tenke iha karteira profisionál, jornalista sira mós tenei iha karteira profisionál.

Prezidente Konsellu Imprensa akresenta tan katak, ho atribuisaun ida ne’e, dala ida tan hakarak hatete importante tebe-tebes, tanba média hanesan pilár dahaat demokrasia nian atu  bele kontribui ba dezenvolvimentu no  haree katak iha média barak ne’ebé mosu iha Timor ho sira nia interese oioin, hanesan baibain la’ós konsellu imprensa nia espetativa ba interese públiku nian, média bele serbi públiku di’ak liután ho informasaun kredível no informasaun sira ne’ebé ba lia-loos no informasaun sira ne’ebé bele tulun sidadaun sira hodi foti desizaun ne’ebé loos iha moris loro-loron.

Nia fó énfaze ida katak maske média mosu bara-barak husi Konsellu Imprensa nia hanoin média kontinua la’o tuir kódigu étika, padraun jornalizmu nian, tanba informasaun ne’ebé fó sai ba públiku kontein informasaun ne’ebé mak kredível no mós informasaun ne’ebé mak sai duni hanesan unifikador.

Informasaun ne’ebé publika ka fó sai husi kanal média sira labele kria fali distúrbiu ba públiku, ne’e duni  tenke kumprimentu ba kódigu étika no padraun jornalizmu nian importante teb-tebes.

Iha fatin hanesan, Sekretáriu Estadu Komunikasaun Sosiál (SECOMS), Expedito Dias Ximenes, lori IX Governu Konstitusionál hakarak apresia, tanba governu haree katak Média konvensionál no Média plataforma dijitál ne’e importante ba pilár demokrasia, ho prezensa RAFA no NTV ne’ebé simu sertifikadu husi Konsellu Imprensa  hanesan hetan kredensiál atu hahú servisu hanesan Média konvensionál ida.

“Lori IX Governu Konstitusionál hato’o parabéns no apresia ba RAFA ho NTV, governu sente katak ho média ne’ebé barak liu, bele servisu atu atende komunidade ho informasaun ne’ebé kredível no konfiável hodi ajuda governu, atu nune’e, atividade dezenvolvimentu ne’ebé hala’o daudaun ne’e komunidade bele hatene,” n Expedito Dias Ximenes hateten.

Husi perspetiva governu nia haree katak ho prezensa média sira ne’ebé iha bele mai kompleta tan média sira ne’ebé iha ona durante ne’e, ho avansu teknolojia oras ne’e daudaun konserteza kompetisaun entre média Rádiu streaming no televizaun HD no analog ne’e hanesan kompetisaun.

Governu husu atu média hotu-hotu bainhira hato’o no divulga informasaun tenke verifika no investiga uluk, hodi nune’e, evita informasaun falsa (hoax ka fake news), tanba dalabarak iha soseidade no komunidade Timor-Leste ladún simu informasaun ne’ebé loos nune’e bainhira divulga informasaun halo lai investigasaun, cross check no recheck ho nune’e notísia di’ak.

“Ha’u fiar katak RAFA ho NTV bele lori informasaun ne’ebé kualidade, konfiável no saudável ba iha públiku,’’ Expedito Dias Ximenes hateten.

Lei Komunikasaun Sosiál Timor-Leste iha artigu 28 kona-bá Rejistu Órgaun no Meiu Komunikasaun Sosiál hateten;

1. Órgaun no meiu komunikasaun sosiál sira tenke halo rejistu ida ba iha Konsellu Imprensa
2. Rejistu ne’e medida administrative, la’ós nu’udár aktu autorizasaun nian
3. Konsellu Imprensa estabelese elementu sira ne’ebé tenke temi iha rejistu
4. Rejistu ne’e Konsellu Imprensa sei haruka ba publika iha Jornál Repúblika

RAFA ho NTV nu’udár  órgaun komunikasaun sosiál privada, ne’ebé hamahan aan iha ETO TELCO, hanesan empreza subsidiária husi Grupu Esperança Timor-Oan  ka ETO.

Reportajen ekipa Rafa.tl