“Iha Irregularidade Grave” Governu Anula Rekrutamentu PNTL 2025

Kadetes PNTL tuir teste fiziku. Imajen/Dok.Rafa.tl

DÍLI, RAFA.tl– Governu liu husi areuniaun Konsellu Ministrus, Kuarta (25/03/2026), análize aprezentasaun husi Ministru Interiór, Francisco da Costa Guterres, kona-ba konkluzaun relatóriu finál hosi Komisaun Monitorizasaun no Fiskalizasaun Konkursu Públiku Admisaun ba Kursu Formasaun Ajentes PNTL nian, ne’ebé kria tuir Rezolusaun Governu n. 10/2026, loron 11 fulan-Fevereiru, ne’ebé identifika evidénsias sufisientes lubun ida hodi hatudu ezisténsia “irregularidades materiais ne’ebé grave” iha prosedimentu konkursu nian ida-ne’e.

Lee Mós: PM Xanana Anunsiu Rekrutamentu Foun Ba PNTL

Relatóriu ne’e mós aprezenta medidas estruturál lubuk ida ne’ebé sei adota ba konkursu iha futuru no rekomenda posibilidade atu instaura (hahú) prosedimentu hodi buka-hatene responsabilidades, kona-bá konduta ne’ebé bele sai nu’udar violasaun ba devér funsionál ka norma legál sira.

Haree ba irregularidade ne’ebé identifika ne’e, Konsellu Ministrus aprova projetu Rezolusaun Governu ne’ebé determina anulasaun parsiál ba Konkursu Públiku Admisaun iha Kursu Formasaun Ajentes Polísia Nasionál Timor-Leste 2025 no mandatu ba abertura konkursu iha tinan 2026.

Rezolusaun Governu ne’e determina repetisaun provas selesaun (kulturál, psikolójika no saúde) ba kandidatu hotu-hotu ne’ebé admitidu iha faze inisiál (prova dokumentál) konkursu nian.

Ministru Interiór Francisco da Costa Guterres, hetan instrusaun atu nomeia juri foun ida, ho kompozisaun reforsada ida ne’ebé inklui entidade nasionál no internasionál sira ho kompeténsia rekoñesida, no atu kria Komisaun Supervizaun no Fiskalizasaun independente ida, ho partisipasaun parseiru internasionál sira, ho objetivu atu garante transparénsia, legalidade no imparsialidade hosi faze hotu-hotu prosesu nian.

Rezolusaun Governu ne’e hato’o mós rekoñesimentu ba dedikasaun no serbisu ne’ebé Komisaun Monitorizasaun no Fiskalizasaun hala’o, hodi destaka ninia kontribuisaun ba salvaguarda kredibilidade instituisaun públika no direitus sidadaun sira nian.

Reportajen ekipa Rafa