Ramos-Horta Sei Haré Proposta Indultu Ba Richard Daschbach

Eis Padre Richard Daschbach (klaran) rona sentensa ne'ebé Tribunál Oé-Cusse hatun iha Dezembru 2021. Imajen/Dok

Díli, 14 Maiu 2026 (RAFA.TL)–Prezidente Repúblika, José Ramos-Horta, konfirma katak nia seidauk haré lista indultu ne’ebé  aprezenta husi Governu liuhusi Ministériu Justisa  kona-bá prezu sira ne’ebé atu hetan indultu iha loron restaurasaun independénsia, 20 Maiu 2026.

Lista prizioneiru hamutuk na’in-40 resin mak Ministériu Justisa atu haruka ba Xefe Estadu atu bele hetan indultu ka komutasaun ba kastigu, entre sira ne’e inklui mós  eis Padre Richard Daschbach.

Ministru Justisa, Sergio Hornai konfirma ba jornalista sira katak aprezenta ona lista hodi repete katak desizaun finál iha Xefe Estadu nia liman, tuir kbiit ne’ebé Konstituisaun fó ba Xefe Estadu.

Iha kazu Daschbach nian, Ministru Justisa, Sergio Hornai, konfirma katak pedidu ne’e iha relasaun ho prizioneiru nia idade avansadu, hodi konsidera kestaun sira hanesan “kompaixaun umanitáriu” bainhira halo lista.

Ba kestaun ne’e, Xefe Estadu inform aba jornalista sira katak nia seidauk haree lei ka proposta husi Governu kona-bá preizioneiru sira atu indultu ka komuntasuan pena.

“Ha’u seidauk haré lei ne’e no mós rekomendasaun husi governu, ha’u seidauk haré, orsida, ha’u hanoin iha ona Palásiu Prezidensiál, ha’u sei haré depois sei konsulta ho Primeiru-Ministru, tenki haré algo individual tinan hira ona iha prizaun krime saida,” Ramos-Horta hateten, Kinta (14/05/2026), bainhira fila husi nia viajen Estadu ba Papua Nova Guine.

Ramos-Horta hateten “iha baze umanitáriu ruma ka la’e, hanesan uluk fulan kotuk liubá indultu ba inan ida prizauna Gleno ho oan, oan mós iha ne’ebá, maski krimi ne’e forte no omesidu ha’u preokupadu ho señora ne’e liu-liu nia oan, ha’u fó indultu.”

“Portantu kazu sira ne’e ita tenki haré did’ak, idade tempu hira ona mak kumpri, krime ne’e oinsá lós ,saida lós. Ne’e tenki hatene, buka buat sira ne’e hotu-hotu ko’alia ho Primeiru-Ministru, ne’e la’os ha’u-nia desizaun mesak, maski mai ona husi Governu, ha’u sukat, tetu buat hotu-hotu,” Xefe Estadu José Ramos-Horta afirma tan.

Richard Daschbach, padre no fundador orfanatu Topu Honis iha Oé-Cusse, hetan kondenasaun husi Tribunál Primieira Intánsia Oé-cusse tanba krime abuzu seksuál ba labarik. Vítima sira maka labarik-feto sira iha situasaun vulneravel tebes ne’ebé moris iha nia kuidadu nia okos.

Iha fulan-Dezembru tinan 2021, Tribunál Primeira Intánsia Oé-Cusse hatun desizaun fó sentensa ba eis padre Richard Daschbach ho pena efetivu prizaun tinan-12. Nune’e, iha fulan-Dezembru mai ne’e, Richard Daschbach kumpre hela prizaun foin ba tinan-lima.

Jornalista: Remigia Locatelli/Editór: Vito Salvadór