Kona-bá Ró Hakoslok, Santana Lopes Konsidera “Vergonha ida” no “Skándalu” Tanba Konflitu Polítika iha Timor-Leste

Ró Haksolok

Figueira da Foz, 6 Maiu 2026 (RAFA.TL) – Prezidente Câmara Municipal iha Figueira da Foz, Pedro Santana Lopes, hatete katak situasaun Ró Haksolok ne’ebé Timor-Leste komanda atu halo, maibé to’o agora seidauk remata no para hela iha estaleiru naval besik tinan 10 ona, sai problema boot ida tanba konflitu polítika iha Timor-Leste.

Notísia Relevante: Governu husu Ministériu Públiku Halo Auditóriu Ba Akizasaun Aviaun Twin Otter no Ró Haksolok

Nia ko’alia kona-bá ida ne’e bainhira José Manuel Fernandes ho Salvador Malheiro vizita estaleiru AtlanticEagle Shipbuilding iha loron 4 Maiu.

Pedro Santana Lopes dehan katak difísil atu kompriende tanbasá Timor-Leste no Portugál seidauk bele rezolve problema ne’e, maske kleur tebes ona. Nia dehan katak situasaun ida ne’e la di’ak ba ekonomia lokal no mós estraga imajen sidade Figueira da Foz. Nia hatete klaru katak obra hanesan ne’e tenke remata, la’ós atu husik para deit.

Nia mós hatutan katak, maski iha mundu iha nasaun sira ne’ebé funu malu, sira sei buka dalan atu ko’alia no rezolve problema. Tanba ne’e, nia haré katak la iha justifikasaun atu husik problema ida-ne’e la rezolve tanba konflitu polítika ka falta entendimentu.

Nia sente katak situasaun ida-ne’e kleur liu ona no bele ofende dignidade ema sira, liu-liu peskadór sira no mariñeiru sira ne’ebé lor-loron servisu no haré Ró ida para de’it. Nia dehan katak ema barak tau sala ba polítiku sira no iha kazu ida-ne’e, nia dehan katak polítiku no diplomata sira mak tenke buka solusaun.

Iha intervensaun ida iha televizaun, nia dehan katak problema ne’e liga diretamente ho konflitu polítika iha Timor-Leste entre Mari Alkatiri no Xanana Gusmão.

Nia hatete katak nia respeita Timor-Leste hanesan nasaun independente, maibé la hakarak problema polítika iha ne’ebá afeta sidade Figueira da Foz. Nia mós dehan katak Governu Portugál halo ona esforsu barak, maibé tanba la iha akordu, problema ne’e sei la rezolve. Nia bolu situasaun ida ne’e hanesan “skándalu” no “vergonha”.

Ministru José Manuel Fernandes mós dehan katak projetu hanesan ne’e importante tebes no tenke remata tuir prazu, tanba se lae bele iha konsekuénsia. Nia dehan katak Portugál sei tenta ajuda, maibé desizaun final la depende de’it ba sira.

Kona-bá Ró Haksolok

Ró Haksolok na’in mak Estadu Timor-Leste iha tinan 2014 atu halo transporte marítima entre Díli, Ataúro no Oecusse.

Ró ne’e naruk metru 73, bele lori ema 377 no kareta 26. Lansa ba tasi iha 2017, maibé konstrusaun para iha 2018 tanba problema osan no estragus husi furakaun Leslie.

Depois, Timor-Leste sai na’in ba 95% husi empreza AtlanticEagle Shipbuilding no investe besik  millaun 12 dálar amérikanu husi total millaun 20. Obra hahú fali iha 2022, maibé para fali iha fulan-Marsu 2024 bainhira progresu to’o ona 85%. To’o agora, Ró Haksolok seidauk termina no problema ne’e sei hein solusaun.

Reportajen Ekipa Rafa.tl