Kirsty Gusmão Apoia Karreta Ida Ba SABEH Hodi Fasilita Atividade Koidadu Saúde iha Área Rurál

Fundadora Fundasaun Alola, Kirsty Sword Gusmão, apoia  karreta ida ba ONG Saúde Ba Ema Hotu (SABEH) atu fasilita atividade kuidadu saúde bá komunidade iha área rurál no remota, Segunda 24 Agostu 2026.

Díli, 24 Agostu 2026 (RAFA) – Fundadora Fundasaun Alola, Kirsty Sword Gusmão, Segunda-ne’e, apoia  karreta ida ba Organizasaun Naun Governamentál (ONG) Saúde Ba Ema Hotu (SABEH) atu fasilita atividade kuidadu saúde bá komunidade iha área rurál no remota.

Karreta ne’e entrega diretamente hosi Kirsty Sword Gusmão ba Diretór Ezekutivu SABEH, dr. Andrezinho Belo, iha Lecidere, Díli.

Sita husi komunikadu ofisiál, Kirsty Sword Gusmão,    haktuir nia parte deside apoia SABEH tanba konsidera servisu organizasaun ne’e importante, liuliu iha área remota sira ne’ebé komunidade enfrenta difikuldade asesu ba servisu saúde tanba distánsia dook hosi postu saúde.

“Ha’u rona kona-bá servisu ne’ebé dr. Andre halo hamutuk ho ninia organizasaun naun governamentál SABEH, ne’ebé fornese servisu saúde bá povu iha área remota sira. Tanba ha’u mós servisu iha Fundasaun Alola ne’ebé hare saúde hanesan área importante, ha’u hanoin atu ajuda hodi fasilita sira-nia servisu,” Kirsty Sword Gusmão     hateten.

Kirsty Sword Gusmão mós hato’o agradese ba na’in Kompañia Bandido Qualidade,  Marito, ne’ebé responde pozitivu bá ninia pedidu atu fornese karreta ida ba SABEH.

“Nia osan la barak, maibé riku liu mak ha’u iha belun barak. Tanba ne’e, ha’u konsege husu ajuda ba Sr. Marito atu bele fornese karreta ida hodi ajuda Dr. Andre no voluntáriu sira hala’o servisu,” nia hateten.

Diretór Ezekutivu SABEH, Andrezinho Belo, hato’o agradese ba Kirsty Sword Gusmão tanba apoia transporte ne’e bele fasilita servisu organizasaun nian ba komunidade iha área remota.

“Ha’u labele deskreve ha’u-nia kontente, maibé ha’u agradese tebes tanba mana Kirsty bele haré saida mak SABEH presiza no saida mak komunidade presiza. Apoiu ne’ebé nia fó sei fasilita ami-nia servisu ba komunidade iha área remota,” Andrezinho Belo hateten.

Andrezinho hateten katak SABEH kontinua hala’o servisu saúde ba komunidade, liuliu ba ema sira ne’ebé enfrenta difikuldade asesu ba tratamentu tanba kondisaun saúde, falta transporte no distánsia dook hosi fasilidade saúde.

SABEH hala’o mós programa saúde eskolar, ne’ebé involve médiku, parteira no enfermeiru voluntáriu sira atu hala’o rastreiu (screening) iha eskola sira, hodi identifika problema saúde estudante sira nian no buka resposta apropriada.

Programa seluk mak kuidadu paliativu komunidade, ne’ebé foka ba tau-matan ba ema ho moras króniku, inklui moras kánkru.

Kuidadu ne’e la haree de’it aspetu fíziku, maibé mós aspetu psikolojiku, sosiál no espirituál husi pasiente sira.

Andrezinho Belo hateten katak apoiu transporte ne’e sei permite SABEH aumenta atividade sira tanba durante ne’e organizasaun enfrenta limitasaun transporte.

“Ho apoia transporte ne’e, ami bele hala’o atividade barak liután, tanba durante ne’e ami hasoru difikuldade iha transporte. Voluntáriu SABEH hamutuk na’in 64 uza transporte ida de’it ba fatin sira,” nia haktuir.

Tuir Andrezinho, SABEH sei servisu hamutuk ho Fundasaun Alola no Halibur Ema Moras Kánkru (HALIKU) atu tau-matan ba inan sira ne’ebé sofre moras kánkru mama, ho prinsipiu dignidade, justisa no kompaixaun.

Jornalista: Juvinal Cabral dos Santos