Kazu Scam Call Centre iha City-8, Tribunál Aplika Medida Haat no Kausaun US$2,000.00 Ba Kada Arguidu Na’in-32

Polísia halo detensaun ba arguidu sira kazu scam call centre iha City-8.

Díli, 21 Jullu 2026 (RAFA.TL) – Tribunál Judisiál Primeira Instánsia Díli (TJPID), Tersa-ne’e, liu husi despaisu ikus ba prosesu primeiru interogátoriu deside aplika medida haat hanesan Aprezentasaun Periodika, Proibisaun Auzensia, médida kausaun ho montante US$2,000.00 ba kada arguidu hamutuk na’in-32 no kontinua ho medida Termu Identifikasaun Rezidénsia (TIR).

Tribunál mós fó prazu loron 10 ba arguidu sira hodi depozita kausaun ne’ebé iha ba Tribunál. Bainhira  la depozita, Tribunál sei halo alterasaun husi medida kausaun ba fali iha medida Prizaun Preventiva.

Iha audénsia primieru interogatóriu ne’e, Ministériu Públiku (MP) reprezenta husi Prokuradór Rafael Gusmão ho João Marques, halo promosaun ba arguidu na’in-32 ho krime haat (4) mak hanesan Krime Jogu ilísitu, Asosiasaun Kriminoza, Burla informatika no krime Brankamentu kapitais, tanba deskonfia envolve iha jogu online Scam Call Centre.

Iha alegasaun Ministériu Públiku nian solisita ba Tribunál atu aplika medida koasaun Aprezentasaun Periodika, medida Proibisaun Auzensia no medida Kausaun ba kada arguidu hamuk ta’in-32 tenke selu ho osan US$2,000.00.

Enkuantu parte Defeza husu Tribunál atu aplika medida koasaun Aprezentasaun Periodika, medida Proibisaun Auzensia no medida Kausaun ho osan menus husi US$2,000.00 bazeia ba sira nia kondisaun ekonomika, tanba sira ne’e traballadór.

Polísia Nasionál Timor-Leste (PNTL) detein arguidu na’in-32 ne’e  iha Otél City-8 Manleuana ho flagrante delitu.

Prosesu Primeiru Interogatoriu ne’e prezide husi Juiz estajiariu Rosito Guterres,  Ministeriu Públiku reprezenta husi Prokuradór  Rafael Gusmão ho João Marques, arguidu na’in-32 hetan asisténsia legal husi Advogadu Privadu, Januario Perreira, Octavio Cardoso  no advogadu Estranjeiru na’in-rua.

 Jornalista : João Carlos Amaral/Editór: Vito Salvadór