Kazu Rede Scam Call Centre Metiaut, Tribunál Aplika Prizaun Preventiva Bá Arguidu Sira

Tribunál aplika medida koasaun prizaun preventiva ba arguidu 15 ba kazu rede scam call centre iha Metiaut, Domingu 09 Agostu 2026.

Díli, 09 Agostu 2026 (RAFA)–  Tribunál Judisiál Primeira Instánsia Díli (TJPID),  Domingu -ne’e,  aplika prizaun preventiva arguidu na’in-15 ne’ebé envolve iha rede atividade ilísitu scam call centre ne’ebé Polísia dezmantela iha área  Bekaril, Suku Metiaut, Munisípiu Díli.

Julgamentu primeiru interogátoriu iha loron-rua tuituir malu,  Sabádu- Domingu ne’e,  arguidu na’in-15  ne’ebé  envolve iha prátika jogu ilísitiu scam call centre hili direitu nonook.

Ministériu Públiku reprezenta husi Prokuradór João Marques, akuza  arguidu sira ho krime Asosiasaun Kriminoza, burla informátika,  esplorasaun jogu ilísitiu, brankeamentu kapitál ne’ebé  previstu no punidu iha kódiku penal Timor-Leste. Nune’e, Prokuradór João Marque sulisita ba Tribunál atu aplika prizaun preventiva,  no pedidu alternativa,  ho  médida kausaun bá kada arguidu US$5,000.00

Advogadu privadu, Januário Martins,  Otavio Cardoso, ho Martinho da Cruz,  husu tribunál atu  aplika termu identidade rezidensia (TIR) no prebuisaun auzénsia.

Defeza hato’o pedidu bá  Tribunál katak,  atuasaun  autoridade bá  arguidu na’in-15 ne’e ilegál tanba la hetan mandadu husi Tribunál, maibé rona de’it informasaun husi li’ur.

Rona tiha alegasaun husi Minitériu públiku ho  defeza sira, Juiza prosesu  Ana Paula Fonseca konsidera iha  indísiu forte, nune’e hatún despaixu hodi aplika  Prizaun Preventiva bá arguidu hamutuk na’in-15 ne’e.

Maske nune’e,  Advogadu Privadu ne’ebé fó asistensia legál bá  arguidu sira la konkorda  ho desizaun tribunal, nune’e ekipa advigadu  sei rekorre rekursu hodi kontra desizaun refere.

Ekipa konjunta Polísia Nasionál  Timor-Leste (PNTL) liuhosi Diresaun Servisu Investigasaun Kriminal (DSIK) hamutuk ho Diresaun Servisu Informasaun Polísia (DSIP),  Servisu Migrasaun (SM), Kinta-kalan, 06 fulan-Agostu ne’e halo operasaun no detein sidadaun estranjeiru na’in-15 (mane na’in-12 no feto na’in-tolu) ne’ebé  suspeita iha rede scam call centre iha área Suku Metiaut, Díli.

Observasaun  RAFA  nian iha Trinunál Judisiál Primeiru Instánsia Díli, nota katak, hafoin  julgamentu prirmeiru interogátoriu ne’e,  Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK),  akompaña arguidu   sira bá  komandu  Munisípiu Díli  hodi hasai farda detidu no  transporte kedas bá Prizaun Becora, hodi kumpri desizaun Tribunál.

Jornalista: Marcelino Tomae