Kazu Hadau Karteira iha Praia dos Coqueiros, Arguidu Na’in-Rua Kumpre Prizaun Preventiva

Polísia lori arguidu na'in-rua ba partisipa audénsia julgamentu primeira interogatóriu iha TJPID, Kinta 11 Juñu 2026.

Díli, 11 Juñu 2026 (RAFA.TL)-Tribunál Judisiál Primeira Instánsia Díli (TJPID) liu husi despaisu ba iha prosesu primeiru interogatóriu aplika medida Prizaun Preventiva ba arguidu na’in-rua ne’ebé alegadamente ba kazu hadau karteira iha área Praia dos Coquiros, Díli, to’o rezulta Nadine lakon vida.

Arguidu na’in-rua submete mai iha Tribunál, Kinta (11/06/2026), oras tuku 09:00 Otl no akompaña direita husi autoridade polísia hodi tama ba sala julgamentu hodi partisipa primeiru interogatoriu ne’ebé lao kuaze oras neen nia laran.

Arguidu na’in-rua ne´e autoridade seguransa liu husi Diresaun Servisu Investigasaun Kriminal rejista ho prosesu númeru uniku krime (NUC), 0602/26.PNSIK, no Ministeriu Publiku (MP) promove arguidu na’in-rua ho krime roubu ne’ebé previstu iha artigu 253, no krime Ofensa Neglijente ne’ebé previstu iha artigu 148, ho krime omisidiu neglijente ne’ebé previstu iha artigu 140 husi Kodigu Penal Timor-Leste nian.

Iha despaisu Juiz Turnu Ivan Patrocenio deside aplika medida Prizaun Preventiva ba arguidu na’in-rua, tanba konsidera iha indisiu forte ba krime ne’ebé Ministeriu Públiku (MP) promove mai iha Tribunál.

Iha alegasaun Ministériu Públiku (MP) ne’ebé reprezenta husi Prokuradór Aderito Tilman husu Tribunál atu aplika medida Prizaun Preventiva ba arguidu na’in-rua. Enkuantu parte defeza nian, Defensór Publiku Fernando de Carvalho, husu Tribunál tetu atu aplika medida ba arguidu na’in-rua.

Prosesu primeiru interogatoriu ne’e prezide husi Juiz  Ivan Patrocnio, Ministériu Públiku reprezenta husi Prokuradór Aderito Tilman, arguidu na’in-rua hetan asisténsia legal husi Defensór Públiku, Fernando de Carvalho.

Hafoin despaisu Tribunál nian hatun, arguidu na’in-rua akompaña husi autoridade Seguransa, lori kedan ba iha Sentru Prizional Becora.

Fó hanoin fali katak, arguidu na’in-rua ne’e, polísia detein tanba alegadamente naok karteira iha área Praia dos Coquiros iha 07 fulan-Juñu ne’e, hodi rezulta Nadine lakon vida no nia bin hetan kanek todan no hetan tratamentu iha Ospitál Nasionál Guido Valadares.  Husi akontesimentu ne´e, ikus mai autoridade seguransa kaptura  na’in-rua iha BTN Tasi-Tolu.

Jornalista: João Carlos/Editór: Vito Salvadór